توشہ خانہ 2 کیس: عمران خان اور بشریٰ بی بی کے خلاف نیب گواہ کا بیان قلم بند

پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی کے خلاف توشہ خانہ 2 کیس کی سماعت اڈیالہ جیل میں قائم خصوصی عدالت میں ہوئی، جہاں نیب کے اسسٹنٹ ڈائریکٹر آفتاب احمد نے بطور گواہ اپنا بیان قلم بند کرایا۔

کیس کی سماعت اسپیشل جج سینٹرل شاہ رخ ارجمند نے کی، جبکہ عمران خان اور بشریٰ بی بی کو عدالت میں پیش کیا گیا۔ سماعت کے دوران بشریٰ بی بی کے وکیل ارشد تبریز نے آفتاب احمد پر جرح مکمل کرلی، جبکہ عمران خان کے وکیل قوسین مفتی آئندہ سماعت پر جرح کریں گے۔

عدالت نے آئندہ سماعت پر دو مزید گواہوں کو طلب کرنے کا حکم دیا ہے، جن کے بیانات قلم بند کیے جائیں گے۔ کیس کی سماعت 6 اگست تک ملتوی کر دی گئی ہے۔

عدالتی کارروائی کے بعد یہ بھی بتایا گیا ہے کہ عمران خان کو ان کے بیٹوں قاسم اور سلیمان خان سے فون پر ایک گھنٹے سے زائد وقت تک بات کروائی گئی۔

ذرائع کے مطابق عمران خان نے گفتگو کے دوران کہا کہ انہیں فون پر معلوم ہوا کہ بچوں کے نائیکوپ کارڈ کی مدت ختم ہو چکی ہے۔ انہوں نے واضح کیا کہ "میں نے کبھی یہ نہیں کہا کہ میرے بچے کسی احتجاجی تحریک کے لیے پاکستان آئیں گے، تاہم اگر وہ ملاقات کے لیے آنا چاہیں تو ضرور آئیں۔

مزید یہ کہ ذرائع کا کہنا ہے کہ جیل میں عمران خان کو اخبارات، ٹی وی اور دیگر بنیادی سہولیات دوبارہ فراہم کر دی گئی ہیں۔