ایرانی صدر وفد کے ہمراہ اسلام آباد پہنچ گئے

ایران کے صدر مسعود پزشکیان کی اسلام آباد آمد پر وزیرِاعظم شہباز شریف نے ایئرپورٹ پر معزز مہمان کا پرتپاک استقبال کیا۔ اس موقع پر نائب وزیراعظم اسحاق ڈار، وفاقی وزیر اطلاعات عطا اللہ تارڑ اور دیگر اعلیٰ حکام بھی موجود تھے۔

ایرانی صدر کو ریڈ کارپٹ استقبال کے ساتھ ساتھ 21 توپوں کی سلامی پیش کی گئی، جو دونوں ممالک کے درمیان برادرانہ تعلقات کی عکاسی ہے۔

اس سے قبل ایرانی صدر اپنے پہلے سرکاری دورۂ پاکستان کے دوران لاہور پہنچے، جہاں ان کے ہمراہ اعلیٰ سطح کا وفد بھی موجود تھا۔ لاہور ایئرپورٹ پر ان کا استقبال سابق وزیراعظم اور مسلم لیگ (ن) کے قائد میاں نواز شریف اور وزیراعلیٰ پنجاب مریم نواز نے کیا۔ اس موقع پر پنجاب حکومت کے سینئر حکام بھی موجود تھے۔

ایرانی صدر کے اس دورے کو دونوں ممالک کے درمیان تعلقات کو مزید مضبوط بنانے کی اہم کڑی قرار دیا جا رہا ہے۔