کورونا کی دوسری لہر: لاہور کے 6 علاقوں میں سمارٹ لاک ڈاؤن نافذ

 محکمہ صحت پنجاب  کی جانب سے جاری نوٹیفکیشن   کے مطابق علی ویو گارڈن ،   بیدیاں روڈ(گلی نمبر 1)  ، ڈیفنس فیز 3 اور فیز 5 ای بلاک (گلی نمبر 21 اور 20) میں اسمارٹ لاک ڈاوَن نافذ کیا گیا ہے۔   اس کے علاوہ علامہ اقبال ٹاؤن ،  فیصل ٹاوَن بلاک سی 1 (مین اسٹریٹ)  ،    الاحمد گارڈن   (  اے بلاک )   اور   مناواں میں بھی گلیاں سیل ہوں گی۔

نوٹیفکیشن کے مطابق مذکورہ بالا علاقوں میں شاپنگ مالز، ریسٹورانٹ، نجی اور سرکار ی دفاتر بند رہیں گے۔

پنجاب میں گذشتہ دو ہفتوں کے دوران کورونا کے مثبت  کیسز میں اضافہ ہوا ہے۔  عوام کی حفاظت کو مدنظر رکھتے ہوئے وبا  کی روک تھام اور اس پر قابو پانے کے لئے  ہر ممکن اقدامات اٹھائے جارہے ہیں ۔قبل ازیں  کورونا کے پیش نظر گزشتہ ماہ  لاہور کے 17 علاقوں میں سمارٹ لاک ڈاؤن لگایا گیا تھا ۔

خیال رہے کہ عالمی وبا کورونا وائرس کے سبب پاکستان میں مزید 40 اموات اور ایک ہزار 8 نئے کیسز سامنے آئے ہیں۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید40افراد چل بسے جس کے بعد اموات کی مجموعی تعداد12 ہزار066ہوگئی ہے ۔ پنجاب میں کورونا مریضوں کی تعداد ایک لاکھ 61ہزار347ہوگئی ۔ جبکہ صوبے میں اب تک 4 ہزار919 افراد جان سے ہاتھ دھو بیٹھے ہیں ۔ ملک میں‌ اب تک کورونا کے5لاکھ56ہزار519کیسزرپورٹ ہوچکے ہیں   جبکہ ملک میں کورونا سے 5 لاکھ 12 ہزار 943 افراد صحتیاب ہو چکے ہیں ۔