آج کے پاکستان سے پرانا پاکستان بہتر تھا : شہباز شریف

تفصیلات کے مطابق قومی اسمبلی میں بجٹ سیشن سے خطاب کرتے ہوئے اپوزیشن لیڈرشہبازشریف نے کہا کہ ملک کے 22 کروڑ عوام نے ہمیں یہاں بھجوایا ہے اور ہم اِن کی نمائندگی کرنا چاہتے ہیں۔ ہم یہ بجٹ پاس نہیں ہونے دیں گے اور اس بجٹ کے خلاف سیسہ پلائی ہوئی دیوار بن جائیں گے۔3سال بعد ہمیں دوبارہ ریورس گیئر لگ چکا ہے اور اگر مہنگائی اور بیروزگاری میں کمی نہیں ہوئی تو یہ بجٹ دھوکا ہے۔ تمام صوبوں میں یکساں ترقی ہوگی تو ملک آگے بڑھے گا۔ انھوں نے دہرایا کہ پاکستان کے لئے کسی کے بھی گھٹنے پکڑنے کو تیار ہوں۔

شہباز شریف نے بتایا کہ پچھلے 3 برسوں میں ٹیکسوں کی بھرمار کی گئی لیکن ٹیکس ریوینو سے غریب کی ایک روٹی آدھی ہوچکی ہے۔ لوگوں نے بچوں کی فیس ادا نہ کرنے پر اسکول سے نکال لیا ہے۔

بجٹ سے متعلق انھوں نے کہا کہ یہ بجٹ مہنگائی آسمانوں تک پہنچائے گا اور اس  سے ملک میں مزید  بدحالی آئے گی۔ جی ڈی پی پر ان کا کہنا تھا کہ پاکستان تحریک انصاف  کو 5.8 جی ڈی پی گروتھ ملی لیکن اگلے سال یہ جی ڈی پی دھڑام سے نیچے آئی۔ 3سال میں پاکستان میں غربت اور مفلسی نے جگہ لے لی اور جعلی بجٹ کے نتیجے میں50لاکھ لوگ بیروزگار ہوگئے۔

شہباز شریف نے کہا کہ چار دنوں سے قومی اسمبلی میں جو کچھ ہوا وہ افسوس ناک تھا۔ ایوان چلانے کا خرچہ کروڑوں روپے کا ہے اور یہ عوام کی پونجی سے ادا ہوتا ہے۔ حکومت آج اپوزیشن کی بات سنے گی تو اپوزیشن بھی حکومت کی بات سنے گی۔حاليہ دنوں ميں ہونے والی قانون سازی آئين کے مطابق نہيں ہوئی۔ قومی اسمبلی میں اپوزیشن کی آواز نہیں سنی گئی جس کے بعد سینیٹ میں جاکر آواز بلند کی۔

اپنی تقریر میں اپوزیشن لیڈر نے یہ بھی کہا کہ جو پاکستان پابندیوں کے باوجود ایٹمی پروگرام بناسکتا ہے وہ کچھ بھی کرسکتا ہے۔ ایک ہاتھ میں ایٹم بم ہو اوردوسرے ہاتھ میں کشکول ہو تو برا لگتا ہے۔ ہاتھ پھیلانے والا کبھی اپنا فیصلہ نہیں کرسکتا۔ موجودہ حکومت نے قرضوں کو 3 سال میں اتنا لیا گیا کہ سارے ریکارڈ توڑ دیئے۔3 برس میں روپیہ ڈالر کے مقابلے میں 35فیصد گرا اور درآمدات اس ہی تناسب سے گرگئی۔آج تک 2018 کی سطح پر برآمدات نہیں بڑھ سکی ہیں۔

اپنی تقریر میں ان کا کہنا تھا کہ نئے بجٹ میں 120 ارب روپے کا انکم ٹیکس لگنے جارہا ہے۔ فلسطین و کشمیر ہوں یا کرونا یا مہنگائی کے معاملات،وزیراعظم کی کرسی ایوان میں خالی رہتی ہے۔ وزیراعظم کا کام ہے کہ وہ ایوان کو اعتماد میں لیں اور پاکستان کے لئے اپوزیشن کو بھی اعتماد میں لیں۔ انھوں نے زور دے کر کہا کہ یہ جمہوریت ہے اورفاشزم نہیں ہے۔

انھوں نے کہا کہ اس خطے میں پاکستان کرونا وائرس سے بچاؤ کی ویکسین لگانے کی فہرست میں آخری نمبر کا ملک ہے۔شہبازشریف نے کہا کہ ملک میں اس وقت قیامت خیز لوڈشیڈنگ ہورہی ہے۔ نون لیگ کی حکومت  نے بجلی بنائی لیکن پی ٹی آئی نے عوام پر بجلی گرائی۔ سستی بجلی فراہم کرنے والے پلانٹس کو ایل این جی نہیں دی گئی۔

موازنہ کرتے ہوئے شہبازشریف نے کہا کہ نوازشریف کے 3 ادوار کا بجٹ خسارہ ایک طرف اور موجودہ حکومت کے 3 برسوں کا ایک طرف ہے۔ وزرا نے کہا تھا کہ روپیہ گرے تاکہ اس سے سٹہ بازی کو فروغ ملا۔ 3 برس میں کوئی بڑا اسپتال اور کوئی ادارہ یا کوئی ایل این جی ٹرمینل نہیں بنایا گیا۔ موجودہ حکومت نوازشریف کے منصوبوں پر تختیاں لگائی جارہی ہیں۔