کے ٹو پر موسم بہتر، مقامی کوہ پیماؤں کی مدد سے علی سدپارہ اور ساتھیوں کی تلاش جاری

جی این این کے مطابق دنیا کی بلند ترین چوٹی کے ٹو پر پاکستانی پرچم لہرانے والے محمد علی سدپارہ گزشتہ دو روز سے لاپتا ہیں، ان کے ساتھ موجود دو غیر ملکی ساتھیوں کا بھی پتہ نہ چل سکا۔

گزشتہ روز آرمی ہیلی کاپٹرز کے ذریعے 7 ہزار میٹر کی بلندی تک لاپتہ کوہ پیماؤں کو تلاش کیا گیا لیکن خراب موسم اور تیز ہواؤں کے باعث سرچ آپریشن میں مشکلات پیش آئیں۔

تاہم دوسرے روز بھی سرچ آپریشن جاری ہے جس کے لیے آرمی چیف جنرل قمر جاوید باجوہ اور وزیر اعظم عمران خان کی خصوصی ہدایت پر محمد علی سدپارہ اور ساتھیوں کی تلاش کے لئے خصوصی ٹیم تشکیل دی گئی ہے۔ 

آرمی کے دو ہیلی کاپٹر ریسکیو ٹیم بلترو سیکٹر پہنچ گئے،چار مقامی کوہ پیماؤں کی مدد سے آج دوسرے روز بھی سرچ آپریشن کیا جائے گا،تاہم آج باقاعدگی سے زمینی اور فضائی آپریشن شروع کئے جائیں گے۔ 

ذرائع کا کہنا ہے کہ کے ٹو کی 8 ہزار بلندی پر آج موسم قدرے بہتر ہے،وزیر اعظم کے معاون خصوصی زلفی بخاری براہ راست کے ٹو پر ریسکیو آپریشن کی نگرانی کررہے ہیں۔ 

دوسری جانب وزیراعلیٰ گلگت بلتستان نے کہا ہے کہ علی سدپارہ اور دیگر کوہ پیماؤں کی بحفاظت واپسی کے لیے آپریشن جاری ہے جبکہ چیئرمین پیپلز پارٹی بلاول بھٹو زرداری کہتے ہیں محمد علی سدپارہ پاکستان کے قابل فخر ہیرو ہیں ان کی تلاش اولین ترجیح ہونی چاہیے۔