پی ڈی ایم کے سربراہ مولانا فضل الرحمٰن اورمریم نواز کی ملاقات

جی این این کے مطابق مسلم لیگ  ن کی رہنما  مریم نواز کی پی ڈی ایم سربراہ مولانا فضل الرحمٰن کے گھر آمد ،   ملاقات میں لانگ مارچ کے طریقہ کار اور دورانیہ پر گفتگو ہوئی جبکہ لانگ مارچ سے متعلق تمام تجاویز کا سٹیرنگ کمیٹی میں جائزہ لیکر حتمی فیصلہ ہوگا۔ لانگ مارچ اسلام آباد پہنچنے کے بعد پہلا پڑاؤ فیض آباد پر ڈالنے کی  بھی تجویزجبکہ سینیٹ الیکشن میں مشترکہ امیدواروں کی کامیابی یقینی بنانے کی حکمت عملی پر بھی  تبادلہ خیال ہوا ۔ملاقات میں  تحریک عدم اعتماد پہلے پنجاب سے لائی جائے یا بلوچستان سے  اس پر غور کیا گیا جبکہ پیپلز پارٹی کی تحریک عدم اعتماد کی  تجاویز پر بھی غور کیا گیا ۔

4 فروری کو حکومت  گراؤ مشن میں پی ڈی ایم کی طویل بیٹھک ہوئی،  جس میں پی ڈی ایم کے تمام سربراہان نے اجلاس میں شرکت کی،نواز شریف اور آصف زرداری ویڈیو لنک کے ذریعے شریک ہوئے اور اپوزیشن کی جانب سے لانگ مارچ کو مہنگائی مارچ کا نام دینے کی تجویز زیر غور آئی جبکہ پیپلز پارٹی  وزیراعظم کے خلاف تحریک عدم اعتماد لانے پر اصرار کرتی رہی ۔ پی ڈی ایم اجلاس کے اختتام پرسینٹ الیکشن تک استعفوں اور تحریک عدم اعتماد کا معاملہ موخر کردیا گیا جبکہ حکومت مخالف اپوزیشن اتحاد پاکستان ڈیموکریٹک موومنٹ(پی ڈی ایم)نے  26 مارچ کو لانگ مارچ کرنے کا فیصلہ کر لیا۔

خیال  رہے کہ اپوزیشن جماعتوں کے  اتحاد نے   9فروری کو حیدرآباد ، 13فروری کو سیالکوٹ ، 16کو پشین بلوچستان، 23فروری کو سرگودھا اور 27فروری کو حضدار میں اجتماع اور ریلی منعقد کرنے کا اعلان کر رکھا ہے ۔

واضح رہے کہ20ستمبر 2020 کو  پاکستان ڈیموکریٹک موومنٹ،  اپوزیشن کی آل پارٹیز کانفرنس کے بعد تشکیل پانے والا 11 سیاسی جماعتوں کا  اتحاد ہے جو ’ایکشن پلان‘ کے تحت تین مراحل پرحکومت مخالف تحریک چلا کر حکومت  ختم کرنے  کی کوششوں میں مصروف ہے ۔