سعودی عرب کی پاکستان سمیت 20 ملکوں کے شہریوں پر ملک داخلے پر پابندی

تفصیلات کے مطابق سعودی عرب داخلے پر پابندی کی فہرست میں عرب امارات،جرمنی،امریکا،برطانیہ، جنوبی افریقا،فرانس، مصر، لبنان،پاکستان اور بھارت بھی شامل ہیں۔سفارتکار، سعودی شہری، طبی عملہ اور ان کا خاندان پابندی سے مستثنیٰ ہوگا۔

ترجمان قومی ایئرلائن (پی آئی اے)کےمطابق سعودی حکام کی جانب سے پاکستان سے مسافروں پر 3 فروری رات 9 بجے سے دوبارہ پابندی عائد کر دی گئی ہے اورپابندی کورونا وائرس کی نئی لہر کے تناظر میں لگائی گئی ہے جبکہ سعودی جنرل سول ایوایشن اتھارٹی کی جانب سے نوٹیفکیشن بھی جلد متوقع ہے۔

ترجمان پی آئی اے نے مزید کہا کہ پابندی کے باعث کوئی مسافر پاکستان سے سعودی عرب سفر نہیں کرسکے گا تاہم پابندی کے اطلاق سے قبل پی آئی اے کی پروازوں سیالکوٹ دمام، ملتان تا مدینہ اور اسلام آباد تا ریاض معمول کے مطابق چلیں گی،پی آئی اے کی دو پروازیں کراچی تا جدہ اور لاہور تا مدینہ مسافروں کے ساتھ ابھی محو پرواز ہیں۔

دوسری جانب مسافروں کی آسانی کیلئے پی آئی اے نے سعودی عرب آپریشن جاری رکھنے کا اعلان کیا ہے اورسعودی عرب سے پاکستان آنے والے مسافروں کو واپس لانے کیلئے پروازیں جاری رکھی جائیں گی، جو مسافر پاکستان تا سعودی عرب پروازوں پر بک تھے ان کی بکنگ پابندی کے خاتمے تک ملتوی کی جارہی ہیں اور پابندی ختم ہوتے ہی تمام بکنگ کو پہلی پروازوں پر بحال کردیا جائے گا،تمام مسافروں سے درخواست ہے کہ مزید معلومات یا بکنگ کی تبدیلی کیلئے پی آئی اے سے رابطے میں رہیں اور پی آئی اے کی جانب سے بروقت معلومات کی فراہمی کیلئے اپنے صحیح نمبرز کا اندراج کروائیں۔