فردوس عاشق کا الیکشن کمیشن کے فیصلے پر قانونی چارہ جوئی کا عندیہ

میڈیا سے گفتگو کرتے ہوئے وزیراعلیٰ پنجاب سردار عثمان بزدار کی معاون خصوصی ڈاکٹر فردوس عاشق اعوان کا کہنا تھا کہ الیکشن کمیشن کا فیصلہ جھوٹی راجکماری کےجھوٹے بیانیے کی موت ثابت ہوا،بیانیہ بنایا گیا کہ ادارے اور ایجنسیاں دھاندلی میں ملوث ہیں،وزیر اعظم عمران نے قوم سے وعدہ کیا تھا کہ اداروں کو قانون کے تابع کرنا ہے، ہم اداروں کا احترام کرتے ہیں اور الیکشن کمیشن کے فیصلے کا بھی ہم احترام کرتے ہیں تاہم الیکشن کمیشن کے فیصلے پر قانونی چارہ جوئی کا حق بھی رکھتے ہیں،وزیر اعظم عمران کیساتھ اس حوالے سے مشاورت کا عمل جاری ہے،ختمی فیصلہ کیا جائے گا کہ اپیل میں جانا یا فیصلے کو ماننا ہے۔

انہوں نے مزید کہا کہ کل بھی سب نے دیکھا کہ لاہور کی راجکماری نے پھولن دیوی کا روپ دھار لیا، مجرم لیگ کے نام نہاد لیڈر اپنے گناہ کا حساب دیتے رہے سیاسی یتیم جب چاہیں جس وقت چاہیں میڈیا پر رونما ہوتے ہیں،سیاسی یتیم جھوٹ کو اتنا بولتے ہیں کہ سچ لگے،جہاں جھوٹ کا پرچار ہوگا وہاں حکومت عوام تک سچ پہنچائے گی۔

فردوس عاشق اعوان نے مزیدکہا کہ مسٹر بہتان عباسی نے سب سے پہلا ٹارگٹ عمران خان کو رکھا،لاہور میں جتنے بھی نوسرباز آئے سب کی توپوں کا رخ عمران خان کی جانب تھا۔

قبل ازیں چیف  الیکشن کمشنر سلطان راجہ  کی سربراہی میں فل بنچ نے این اے 75 ضمنی انتخاب میں بے ضابطگیوں سے متعلق کیس کی الیکشن کمیشن میں  سماعت  ہوئی۔الیکشن کمیشن نے فیصلہ سنا دیا ،فیصلے کے مطابق الیکشن کمیشن نے  این 75ڈسکہ  میں ضمنی انتخاب کالعدم قرار  دیتے ہوئے  18 مارچ کو دوبارہ الیکشن  کروانے کا حکم دے دیا ۔ فیصلے میں کہا گیا ہے کہ حلقے میں ضمنی انتخاب شفاف نہیں ہوا، انتخابی ماحول خراب کیاگیا اور لڑائی جھگڑے کے واقعات ہوئے، ووٹرزکوووٹ ڈالنے کیلئےبہترماحول نہیں ملا اور تمام پولنگ اسٹیشن پردوبارہ پولنگ ہوگی ۔