حدیقہ کیانی کی قوالی کے میدان میں انٹری

معروف پاپ سنگر حدیقہ کیانی نہ صرف پوری دنیا میں اپنی آوازکا جادوجگا چکی ہیں  بلکہ حال ہی میں اپنی اداکاری سے بھی مداحوں کے دل جیتنے میں کامیاب رہی ہیں تاہم اب  صوفی میوزک میں ان کی آمد  نے سب کوحیران کردیا ہے ۔ حدیقہ کیانی نے 'جانے اس دِل' قوالی گائی ہے جسے  صوفی اسکور کے یوٹیوب چینل پر ریلیز کیا گیا ہے۔ فوٹو اینڈ ویڈیو شئیرنگ ایپ انسٹاگرام پر شئیرکردہ ایک پوسٹ میں  حدیقہ کیانی  کاکہنا تھا کہ ' یہ مہینہ  ایک خواب کی طرح  ہے ۔۔۔ میری پہلی قوالی 'جانے اس دِل'  کچھ گھنٹے پہلے ہی ریلیز ہوئی ہے ۔  استاد نصرت فتح علی خان کے لیے دھن ترتیب دینے والے استاد دلدار حسین کے ساتھ کام کرنے کا مجھے اعزاز حاصل ہوا ہے ، انہوں نے ہی اس خوبصورت قوالی کو میرے لیے غزل کے انداز میں ترتیب دیا ہے ۔آپ سب کی محبت اور تعاون کے لیے میں بے حد شکرگزار ہوں ۔

8منٹ 32 سیکنڈ کی اس ویڈیو کو عبداللہ حارث نےڈائریکٹ  جبکہ میاں یوسف صلاح االدین  نے  پروڈیوس کیا ہے ۔قوالی کے بول ان کی والدہ خاور کیانی کے ہیں جبکہ    زوہیب حسن نے سارنگی اور عرفان کیانی نے ہارمونیم  پیش کیا ہے۔

حدیقہ کیانی ملکی و بین الاقوامی سطح پر  متعدد ایوارڈ جیت چکی ہیں جبکہ   رائل البرٹ ہال اور کینیڈی سنٹر میں  پرفارم کرنے کابھی اعزاز اپنے نام کرچکی ہیں ۔ حدیقہ کو ان کی موسیقی میں خدمات پرحکومت پاکستان  تمغہ امتیازسے بھی نوازچکی ہے، 2010 میں اقوام متحدہ کی خیرسگالی کی سفیر بھی مقرر ہوئیں ۔