اسٹیج اداکار عابد چارلی کا سرکاری سطح پرعلاج شروع، میڈیکل بورڈ بنا دیا گیا

عبدالسلام علی سے

لاہور: بیماریوں سے نبرد آزما اسٹیج اداکار عابد چارلی کا سرکاری سطح پر علاج شروع کردیا گیا جبکہ ان کے علاج کے لیے میڈیکل بورڈ بھی تشکیل دے دیا گیا ہے۔

عابد چارلی جنرل اسپتال میں زیر علاج ہیں۔ جی این این نیوز کی جانب سے معاملہ اجاگر کیے جانے اور ان کی حالت سے متعلق ویڈیوز وائرل ہونے کے بعد صوبائی وزیر صحت سلمان رفیق نے نوٹس لیتے ہوئے اداکار کو بہترین طبی سہولیات فراہم کرنے کی ہدایات جاری کیں۔

اداکار کی عیادت کے لیے فنکاروں اور صحافیوں کی آمد کا سلسلہ بھی جاری ہے۔ اداکار قیصر پیا، گوشی خان اور دیگر فنکاروں نے اسپتال پہنچ کر عابد چارلی کی خیریت دریافت کی۔

عابد چارلی کی اہلیہ نے بتایا کہ ان کے شوہر کا اسپتال میں بہتر علاج ہورہا ہے اور وہ اس سلسلے میں حکومت پنجاب کی شکر گزار ہیں۔ انہوں نے بتایا کہ وزیر اطلاعات و ثقافت پنجاب عظمیٰ بخاری کی جانب سے پانچ لاکھ روپے کا مالی امداد کا چیک بھی دیا گیا ہے۔

انہوں نے کہا کہ عابد چارلی کی صحت اور علاج سے متعلق سوشل میڈیا پر گردش کرنے والی بعض خبروں میں کوئی صداقت نہیں۔