پاکستانی طلبہ نے انٹرنیشنل نیوکلیئر سائنس اولمپیاڈ میں 4 میڈلز جیت لیے

پاکستان نے ملائیشیا میں منعقدہ انٹرنیشنل نیوکلیئر سائنس اولمپیاڈ میں شاندار کارکردگی کا مظاہرہ کرتے ہوئے ایک گولڈ، ایک سلور اور دو برانز میڈلز اپنے نام کر لیے۔

پاکستانی ٹیم کے رکن محمد طیب بخاری نے گولڈ میڈل، عمار اسد وڑائچ نے سلور میڈل، جب کہ رواح جاوید اور تطہیر آئمہ نقوی نے برانز میڈلز حاصل کیے۔

پاکستان اٹامک انرجی کمیشن کے مطابق، اس بین الاقوامی مقابلے میں چین، جاپان، ترکی سمیت 19 ممالک کی ٹیموں نے حصہ لیا۔ پاکستانی ٹیم کی قیادت ڈاکٹر سجاد طاہر اور ڈاکٹر محمد مقصود نے کی۔

کمیشن کے ترجمان کا کہنا ہے کہ یہ کامیابی پاکستان کی نیوکلیئر سائنس کی تعلیم میں ایک اہم سنگ میل ہے اور اس سے یہ ظاہر ہوتا ہے کہ ملک میں نوجوان سائنسدانوں کی تربیت پر مؤثر کام ہو رہا ہے۔