علیمہ خان کا مشعال یوسفزئی کے سینیٹر منتخب ہونے پر اعتراض: فیصلہ میرٹ کے خلاف ہے

علیمہ خان نے پی ٹی آئی کی سینیٹر منتخب ہونے والی امیدوار مشعال یوسفزئی کے انتخاب کو میرٹ کے خلاف قرار دیا ہے۔ ان کا کہنا ہے کہ سینیٹ نشست پر ٹکٹ دیتے وقت اہل امیدواروں کو نظر انداز کیا گیا، جس سے انصاف کے تقاضے پورے نہیں ہوئے۔

اڈیالہ جیل کے باہر میڈیا سے گفتگو کرتے ہوئے عمران خان کی ہمشیرہ علیمہ خان نے مشعال یوسفزئی کے انتخاب پر تحفظات کا اظہار کیا اور کہا کہ اس فیصلے میں میرٹ کی خلاف ورزی ہوئی ہے۔

علیمہ خان نے کہا، "مشعال یوسفزئی کے علاوہ بھی کئی اہل اور قابل امیدوار موجود تھے۔ سینیٹرز کا انتخاب خالصتاً میرٹ پر ہونا چاہیے تھا۔"

ایک سوال کے جواب میں انہوں نے کہا، "میں ایسے افراد پر گفتگو کر کے اپنا وقت ضائع نہیں کرنا چاہتی، لیکن اصولی مؤقف میرا یہی ہے کہ انتخاب شفاف اور منصفانہ ہونا چاہیے تھا۔"

انہوں نے مزید کہا، "اگر مجھ سے رائے لی جاتی تو میں یہ ضرور کہتی کہ مشعال یوسفزئی کے علاوہ بھی کئی لوگ اس عہدے کے لیے اہل تھے، اور فیصلہ میرٹ کو مد نظر رکھ کر ہونا چاہیے تھا۔"

یاد رہے کہ 31 جولائی کو خیبرپختونخوا میں سینیٹ کی خالی نشست پر ضمنی انتخاب ہوا تھا، جو ثانیہ نشتر کے استعفے کے بعد خالی ہوئی تھی۔ اس ضمنی انتخاب میں پی ٹی آئی کی امیدوار مشعال یوسفزئی کامیاب ہو کر سینیٹر منتخب ہوئیں۔