جون 2025 کیلئےآئی سی سی پلیئر آف دی منتھ کا ایوارڈ جنوبی افریقی بلے باز ایڈن مارکرم کے نام

دبئی : عالمی کرکٹ کونسل (آئی سی سی) نے جون 2025 کیلئے پلیئر آف دی منتھ کا اعلان کردیا۔

جنوبی افریقا کے آل راؤنڈر ایڈن مارکرم آئی سی سی ورلڈ ٹیسٹ چیمپئن شپ کے فائنل میں شاندار کارکردگی کی بدولت پلیئر آف دی منتھ کا ایوارڈ جیتنے میں کامیاب رہے۔

ایوارڈ ملنے پر ایڈن مارکرم نے کہا کہ یہ میرے لیے اعزاز کی بات ہے کہ مجھے یہ ایوارڈ ملا، ورلڈ ٹیسٹ چیمپئن شپ جیت کر جنوبی افریقہ کی نمائندگی کرنا میرے لیے ناقابل فراموش لمحہ ہے۔ 

اس موقع پر ان کا مزید کہنا تھا کہ لارڈز میں یہ فتح ہماری ٹیم کے لیے تاریخی ہے۔،یہ کامیابی ٹیم کی اجتماعی کوششوں کا نتیجہ ہے، خاص طور پر کگیسو ربادا اور ٹیمبا باووما کی اہم شراکتوں نے فتح کو ممکن بنایا۔

یاد رہے کہ جون 2025 کے پلیئر آف دی منتھ کیلئے جنوبی افریقہ کے ایڈن مارکرم اور کگیسو ربادا کے ساتھ سری لنکا کے پاتھم نسانکا کو شارٹ لسٹ کیا گیا تھا، ووٹنگ کے بعد کامیاب ایڈن مارکرم کو پلیئر آف دی منتھ قرار دیا گیا۔