سابق وزیراعظم کے قافلے پر حملہ، قریبی ساتھی جان کی بازی ہار گیا 

ویب ڈیسک: آزاد کشمیر کے سابق وزیراعظم اور استحکام پاکستان پارٹی آزاد کشمیر کے صدر سردار تنویر الیاس خان کے قافلے پر مبینہ فائرنگ کے نتیجے میں ان کے ذاتی محافظ محمد آصف جاں بحق ہو گئے۔

ذرائع کے مطابق یہ واقعہ ٹائیں ڈھلکوٹ کے مقام پر پیش آیا، جہاں نامعلوم افراد نے مبینہ طور پر سردار تنویر الیاس کے قافلے کو نشانہ بنایا۔ فائرنگ کے دوران ان کی گاڑی کو بھی نشانہ بنایا گیا، جبکہ ذاتی محافظ محمد آصف موقع پر ہی جان کی بازی ہار گئے۔

اطلاعات کے مطابق سردار تنویر الیاس خان پارٹی رہنماؤں اور کارکنان کے ہمراہ دو روزہ دورے پر راولاکوٹ جا رہے تھے، تاہم واقعے کے بعد انہوں نے اپنا دورہ منسوخ کر دیا اور راولپنڈی واپس روانہ ہو گئے۔

واقعے کے بعد علاقے میں خوف و ہراس پھیل گیا، جبکہ قانون نافذ کرنے والے اداروں نے حملہ آوروں کی تلاش اور واقعے کی تحقیقات شروع کر دی ہیں۔ حکام کی جانب سے واقعے کی مختلف پہلوؤں سے جانچ کی جا رہی ہے۔