عمران خان نے شہباز شریف کے ہرجانہ کیس میں سپریم کورٹ سے رجوع کرلیا

اسلام آباد: سابق وزیراعظم اور بانی تحریک انصاف عمران خان نے وزیراعظم شہباز شریف کی جانب سے دائر ہرجانے کے مقدمے کے خلاف سپریم کورٹ سے رجوع کرلیا ہے۔

سپریم کورٹ میں دائر درخواست میں عمران خان نے مؤقف اپنایا ہے کہ ایڈیشنل سیشن جج کے پاس ہرجانے کے کیس کی سماعت کا آئینی و قانونی اختیار نہیں، کیونکہ قانون کے تحت یہ اختیار صرف ڈسٹرکٹ اینڈ سیشن جج کو حاصل ہے۔

درخواست میں استدعا کی گئی ہے کہ لاہور ہائی کورٹ اور ایڈیشنل سیشن جج کے احکامات کالعدم قرار دیے جائیں۔

جب تک اپیل کا فیصلہ نہیں آتا، عدالتی کارروائی معطل کی جائے۔

عمران خان نے یہ بھی مؤقف اپنایا کہ متعلقہ ایڈیشنل سیشن جج نے ان کے اعتراض کو مسترد کیا اور بعد ازاں لاہور ہائی کورٹ نے بھی یہ فیصلہ برقرار رکھا، جس پر وہ سپریم کورٹ سے رجوع کرنے پر مجبور ہوئے۔

یاد رہے کہ وزیراعظم شہباز شریف نے عمران خان کے خلاف ہرجانے کا دعویٰ سابقہ بیانات کی بنیاد پر دائر کر رکھا ہے۔