حکومت کوگھربھیجنے کامشن ، پی ڈی ایم آج حیدرآباد میں پاور شوکرے گی

تفصیلات کے مطابق      اپوزیشن اتحاد پی ڈی ایم کے جلسے کی تیاریاں مکمل کر لی گئیں ، شہر کے   مختلف مقامات پر استقبالیہ کیمپ قائم کردیے گئےجبکہ جلسہ گاہ میں اسٹیج تیار کرلیا گیا  ہے ۔  شہر میں پی ڈی ایم میں شامل جماعتوں بالخصوص پیپلز پارٹی کے پرچموں کی بہار‘ تمام سرکاری اور نجی املاک پر جھنڈے اور  بینرز لگائے جارہے ہیں۔ شاہراہوں، عمارتوں کو پارٹی جھنڈوں اور قائدین کی تصاویر سے سجادیا گیا ہے جبکہ ضلعی انتظامیہ کی جانب سے سیکورٹی اور ٹریفک پلان تشکیل دے دیا گیا ۔

پیپلزپارٹی کی میزبانی میں آج ہونے والے جلسے سے بلاول بھٹو زرداری، مولانا فضل الرحمٰن اور دیگر قائدین خطاب کریں گے۔ پاکستان مسلم لیگ(ن ) کی نائب صدر مریم نواز اپنی بیٹی مہرالنسا  کے حادثے کے باعث  شرکت نہیں کرسکیں گی ۔

خیال رہے کہ پی ڈی ایم سربراہ  مولانا فضل الرحمٰن 26 مارچ کو لانگ مارچ کرنے کا اعلان کرچکے ہیں ۔ اس سے قبل پی ڈی ایم   اکتوبرتا  جنوری  گوجرانوالہ ، کراچی ، کوئٹہ ، ملتان ، لاہور ، مردان ، لاڑکانہ ، بنوں ، مالاکنڈ  اور لورالائی میں  جلسے کرچکی ہے ۔

یاد  رہے کہ اپوزیشن جماعتوں کے  اتحاد نے  13فروری کو سیالکوٹ ، 16کو پشین بلوچستان، 23فروری کو سرگودھا اور 27فروری کو حضدار میں اجتماع اور ریلی منعقد کرنے کا اعلان کر رکھا ہے ۔

واضح رہے کہ20ستمبر 2020 کو  پاکستان ڈیموکریٹک موومنٹ،  اپوزیشن کی آل پارٹیز کانفرنس کے بعد تشکیل پانے والا 11 سیاسی جماعتوں کا  اتحاد ہے جو ’ایکشن پلان‘ کے تحت تین مراحل پرحکومت مخالف تحریک چلا کر حکومت  ختم کرنے  کی کوششوں میں مصروف ہے ۔