لاپتہ کوہ پیماؤں کی تلاش جاری ، ساجد سدپارہ نے والد کے زندہ بچنے کی امید چھوڑ دی

جی این این کے مطابق قومی ہیرو علی سدپارہ اور ان کی ٹیم کو دنیا کے دوسرے بلند ترین پہاڑ کے ٹو پر لاپتہ ہوئے 4 روز گزر گئے  مگر کوئی سراغ نہ مل سکا۔ پاک آرمی کے ہیلی کاپٹر آج تیسرے روز بھی قومی ہیرو اور اس کی ٹیم کو تلاش کر رہے ہیں، تاہم خراب موسم کے باعث آج بھی تلاش میں مشکلات کا سامنا ہے۔ 

دوسری جانب علی سدپارہ کے بیٹے ساجد سدپارہ نے والد کے زندہ بچ جانے کی امید چھوڑ دی گزشتہ روز انہوں نے اسکردو میں میڈیا سے گفتگو کرتے ہوئے کہا تھا کہ اب ان کے والد کے زندہ بچنے کے چانسز نہ ہونے کے برابر ہیں۔ امکان ہے کوہ پیماؤں نے کے ٹو سر کر لیا لیکن واپسی پر کوئی حادثہ پیش آ گیا۔ 

ساجد سد پارہ نے بتایا کہ آخری بار والد کو 8200 کی بلندی پر دیکھا تھا، دوپہر12بجے کے قریب میں نیچے آیا تھا۔ جب میں نیچے آیا تب علی سدپارہ اور ٹیم اوپر چڑھ رہے تھے، جہاں تک مجھے لگتا ہے والد نے کے ٹو سر کر لیا ہے۔انہوں نے کہا کہ آکسیجن سلینڈر کا استعمال پریشر کے مطابق ہوتا ہے، اگر2 آکسیجن سلینڈر موجود ہوں تو کم از کم2دن گزار سکتے ہیں، تمام چیزیں مد نظر رکھتے ہوئے لگتا ہے والد کے بچنے کے چانسز کم ہیں۔

قومی کوہ پیما نذیر صابر نے جی این این سےگفتگو کرتے ہوئے کہا کہ کے ٹو دنیا کا خطرناک ترین پہاڑ ہے، اسے سرما میں سر کرنا آسان نہیں،، سدپارہ اور ٹیم جہاں سے لاپتہ ہوئی اسے ڈیتھ زون کہا جاتا ہے۔ واضح رہے کہ پاک فوج کے پہلی کاپٹروں نے گزشتہ روز 7800 میٹر تک پرواز کر کے کوہ پیماؤں کی تلاش کی لیکن کامیابی نہیں ملی تھی۔