ملک بھر میں مہنگائی کا جن بے قابو ، اشیائے خوردنوش عام آدمی کی پہنچ سے باہر

جی این این کے مطابق مہنگائی پر قابو پانے کے حکومتی دعوے جھوٹے نکلے، لاہور، کراچی ، اسلام  آباد اور پشاور سمیت ملک بھر میں اشیاء ضروریہ کی قیمتیں آسمان پر جا پہنچیں، ملک میں چینی 95 سے 100 روپے فی کلو جبکہ 15 کلو آٹے کا تھیلا1ہزارروپے میں دستیاب ہے۔ گھی 220 روپے کلو، لوکل آئل 250 روپے لیٹر ، دال ماش 260اوردال مونگ 220 روپے کلو فروخت ہورہی ہے۔

پشاور میں مہنگائی کے طوفان نے آٹے اور چینی کو اپنی لپیٹ میں لے رکھا ہے ۔غلہ مینڈی میں فائن آٹے کا 20کلو کا تھلا 1400 روپے میکس آٹا 1300روپے میں مل رہا ہے جبکہ چینی 100 روپے کلو میں میںفروخت ہو رہی ہے ۔ؑ پشاور کی غلہ منڈی میں 800 روپے میں ملنے والا سرکاری آٹا دستیاب نہیں جبکہ شہر کے بیشتر یوٹیلیٹی سٹورس پر دو ہفتوں سے آٹا غائب ہے جس سے عوام کو مشکلات کا سامنا ہے۔

صارفین کو سستی اشیاء فراہم کرنے والے یوٹیلٹی سٹوروں پر ایک طرف سستا آٹا او ر کوکنگ  آئل کی سپلائی بند کر دی گئی تو دوسری جانب  چینی اور گھی کے ایک کلو پیک کے لیے دو ہزار روپے کی  خریداری کی شرط رکھی گئی ۔ خریداروں کا کہنا ہے کہ حکومت نے شہریوں کو ریلیف دینے کے لیے 50 ارب کا ریلف پیکج دے رکھا ہے مگر صورتحال اس کے بلکل برعکس ہے۔

دکانداروں کا کہنا ہے کہ چیزیں منڈی سے ہی مہنگی آرہی ہیں۔ مہنگائی کے مارے شہریوں نےوزیراعظم عمران خان سے مطالبہ کیا ہے کہ اجلاسوں اور نوٹسز  کے بجائے مہنگائی کو لگام ڈالنے کیلئے عملی اقدامات کئے جائیں ۔