انڈر19 ایشیا کپ: پاکستان نے متحدہ عرب امارات کو 70 رنز سے شکست دیکر سیمی فائنل کیلئے کوالیفائی کرلیا

دبئی: پاکستان نے متحدہ عرب امارات(یو اے ای) کو 70 رنز سے شکست دے کر انڈر19 ایشیا کپ کرکٹ کے سیمی فائنل کیلئے کوالیفائی کرلیا۔

تفصیلات کے مطابق دبئی میں کھیلے گئے گروپ کے اپنے آخری میچ میں پاکستان نے متحدہ عرب امارات کے خلاف پہلے بیٹنگ کرتے ہوئے 9 وکٹ پر 241رنز بنائے۔

پاکستان کی جانب سےاحمد حسین نے65 اور سمیر منہاس نے 44رنز کی نمایاں اننگز کھیلیں، حمزہ ظہور نے بھی 42 رنز  اسکور کیے۔

جبکہ یوا ے ای کے بولر یوگ شرما نے 3 اور نسیم خان نے 2 کھلاڑیوں کو آؤٹ کیا۔

ہدف کے تعاقب میں یو اے ای کی ٹیم 38ویں اوور میں 171رنز بناکر آؤٹ ہوگئی،متحدہ عرب امارات کی جانب سے ایان مصباح نے 77رنز بنائے جبکہ  پرتھوی مدھو نے 27رنز کی اننگز کھیلی۔

پاکستان کے عبدالسبحان نے شاندار بولنگ کرتے ہوئے 4 کھلاڑیوں کو آؤٹ کیا،اس فتح کے نتیجے میں پاکستان نے ایونٹ کے سیمی فائنل کیلئے کوالیفائی کرلیا۔

خیال رہے کہ گروپ اے سے بھارت جبکہ گروپ بی سے سری لنکا اور بنگلادیش پہلے ہی سیمی فائنل میں پہنچ چکے ہیں۔