کور کمانڈر پشاور کی وزیراعلیٰ خیبر پختونخوا سے ملاقات، امن و امان پر تبادلہ خیال

کور کمانڈر پشاور، لیفٹیننٹ جنرل عمر احمد بخاری نے وزیراعلیٰ خیبر پختونخوا سہیل آفریدی سے ون آن ون ملاقات کی، جس میں صوبے میں مجموعی امن و امان کی صورتحال پر بات چیت ہوئی۔

ذرائع کے مطابق یہ ملاقات جمعے کے روز وزیراعلیٰ سیکرٹریٹ میں ہوئی۔ ملاقات میں دہشتگردی سے نمٹنے اور صوبے میں قانون کی بالادستی برقرار رکھنے کے اقدامات زیر غور آئے۔

ذرائع نے بتایا کہ قبائلی اضلاع میں ترقیاتی منصوبے بھی ایجنڈے کا حصہ تھے۔

وزیراعلیٰ نے زور دیا کہ امن قائم رکھنے کی کوششوں میں تمام اسٹیک ہولڈرز کو اعتماد میں لیا جائے اور دہشت گردی کے خلاف مؤثر حکمت عملی کے لیے مشترکہ لائحہ عمل تیار کیا جائے۔

ذرائع کے مطابق ملاقات کے اگلے دن وزیراعلیٰ نے ایپکس کمیٹی کا اجلاس بھی طلب کیا تاکہ صوبے میں سیکورٹی اور ترقیاتی منصوبوں کا جائزہ لیا جا سکے۔