معصوم فلسطینی پائیدارامن کے لیے صدر ٹرمپ کی مداخلت کے منتظر ہیں،خواجہ آصف 

ویب ڈیسک: وزیردفاع خواجہ آصف نے کہا ہےغزہ میںصہیونی جارحیت کا نشانہ بننے والے معصوم فلسطینی پائیدار امن کے لیے صدر ٹرمپ کی مداخلت کے منتظر ہیں، امید ہے صدر ٹرمپ فلسطین میں امن اور دو ریاستی حل میں تاریخی کردار ادا کریں گے۔ 

سماجی رابطے کی ویب سائٹ ایکس(سابقہ ٹوئٹر) پر خواجہ آصف نے لکھا کہ صدر ٹرمپ کا آذربائیجان اور آرمینیا کے درمیان امن معاہدہ کروانے میں کردار قابلِ تحسین ہے، ٹرمپ روس اور یوکرین کے درمیان امن قائم کروانے میں بھی کردار ادا کرسکتے ہیں۔

خواجہ آصف نے مزید کہا کہ امید ہے صدر ٹرمپ فلسطین میں امن اور دو ریاستی حل میں بھی ایسا ہی تاریخی کردار ادا کریں گے، غزہ میں نشانہ بننے والے معصوم فلسطینی بھی پائیدار امن کے لیے صدر ٹرمپ کی مداخلت کے منتظر ہیں، انسانیت صیہونی مظالم اور فلسطینی نسل کشی کے خاتمے کی منتظر ہے۔

انہوں نے مزید لکھا کہ پاکستان اور بھارت کے درمیان جنگ بندی بھی صدر ٹرمپ کی کوششوں سے ممکن ہوئی تھی، امریکی صدر نے روس کے ساتھ تعلقات بہتر بنانے کا اشارہ بھی دیا ہے، صدر ٹرمپ کی کامیاب امن کوششیں تاریخی اور انسانیت کی خدمت کےمترادف ہیں۔