ہراسانی کیس میں سی ای او کے الیکٹرک پر عائد جرمانہ سندھ ہائیکورٹ میں جمع

سی ای او کے الیکٹرک، مونس علوی نے خاتون کو ہراساں کرنے سے متعلق کیس میں صوبائی محتسب کی جانب سے عائد 25 لاکھ روپے کا جرمانہ سندھ ہائیکورٹ کے ناظر کے اکاؤنٹ میں جمع کرا دیا ہے۔

سندھ ہائیکورٹ میں مونس علوی کی جانب سے صوبائی محتسب کے فیصلے کے خلاف دائر درخواست پر سماعت ہوئی، جس میں متعلقہ حکام عدالت میں پیش ہوئے۔ دوران سماعت عدالت کو بتایا گیا کہ جرمانے کی رقم مکمل طور پر ادا کر دی گئی ہے۔

یاد رہے کہ گزشتہ ماہ صوبائی محتسب نے مونس علوی کو ہراسانی کے الزامات ثابت ہونے پر ان کے عہدے سے برطرف کرنے اور 25 لاکھ روپے کا جرمانہ عائد کرنے کا حکم دیا تھا۔

بعد ازاں سندھ ہائیکورٹ نے مونس علوی کو عہدے سے ہٹانے کے فیصلے کو معطل کر دیا تھا، تاہم ان پر عائد کردہ جرمانے کو برقرار رکھا گیا تھا۔