حج 2026 کے لیے درخواستوں کی وصولی کا آغاز، دوبارہ حج کرنے اور عمر کی بالائی حد کی پابندی ختم

اسلام آباد: وزارت مذہبی امور نے حج 2026 کے لیے درخواستوں کی وصولی کا آغاز کر دیا ہے۔

 ترجمان وزارت مذہبی امور کےمطابق رجسٹرڈ افراد حج 4 سے 9 اگست کے دوران پہلی قسط جمع کروا سکتے ہیں۔

 درخواستیں ملک بھر کے 14 نامزد بینکوں کی سینکڑوں شاخوں میں جمع کرائی جا سکتی ہیں، جبکہ آن لائن پورٹل کے ذریعے گھر بیٹھے بھی درخواست دینا ممکن ہے۔ 

دستیاب نشستیں مکمل ہونے پر حج واجبات کی وصولی روک دی جائے گی۔

ترجمان کے مطابق 11 سے 16 اگست کے درمیان نشستیں دستیاب ہونے کی صورت میں نئے افراد بھی درخواست دے سکیں گے۔حج پیکیج کی لاگت تقریباً ساڑھے گیارہ سے ساڑھے بارہ لاکھ روپے کے درمیان ہوگی، جس میں دم شکر (قربانی) کی رقم بھی شامل ہے۔

ترجمان نے مزید بتایا کہ دوسری قسط کی وصولی یکم نومبر سے کی جائے گی۔

دوسری جانب وزارت نے حج پالیسی میں اہم تبدیلیاں کرتے ہوئے دوبارہ حج کرنے پر پابندی اور عمر کی بالائی حد کو ختم کر دیا ہے۔ تاہم، وہ بچے جو یکم مارچ 2014 کے بعد پیدا ہوئے ہیں، ان کے لیے درخواست دینے کی اجازت نہیں ہوگی۔