ایرانی سفیر کا صدر مسعود پزشکیان کے شاندار استقبال پر پاکستان کو خراج تحسین

اسلام آباد: پاکستان میں ایرانی سفیر رضا امیری نے کہا ہے کہ ایرانی صدرمسعود پزشکیان کے بہترین استقبال پر پاکستان کوخراج تحسین پیش کرتے ہیں۔

 پیر کوسماجی رابطہ کی ویب سائٹ ’’ ایکس ‘‘ پر اپنی پوسٹ میں رضا امیری مقدم نے دورہ کے دوران یادگار اور تاریخی لمحات فراہم کرنے پر وزیراعظم محمد شہباز شریف کو خراج تحسین پیش کیا۔

 انہوں نے ایوان صدر میں صدر مملکت آصف علی زرداری کی ایرانی وفد کی شاندار میزبانی پر بھی اظہار تشکر کیا۔

 ایرانی سفیر رضا امیری نے کہا کہ وزیراعظم شہبار شریف کی جانب سے تاریخی اور یادگار لمحات کی فراہمی پر مشکورہیں،صدر آصف علی زرداری کی جانب سے ایوان صدر میں پرتپاک استقبال پر تہہ دل سے شکرگزار ہیں۔

ایرانی سفیر نے کہا کہ فیلڈ مارشل عاصم منیر کی جانب سے تعاون کی فراہمی پر بھی شکریہ ادا کیا، انہوں نے کہا کہ نواز شریف اور وزیراعلیٰ پنجاب مریم نواز نے لاہور میں بہترین میزبانی کی۔

رضا امیری نے کہا کہ پاکستان اور ایران کے درمیان معاہدوں کی تکمیل میں وزرا کا کردار قابل تحسین ہے، مشترکہ ویژن کی تکمیل میری اور سفارتخانے کی اولین ترجیح ہے۔