عدالتی نظام  جانبدار ہو چکا ہے ،5 اگست سے ملک گیر احتجاجی تحریک شروع کریں گے ، سلمان اکرم راجہ

پاکستان تحریک انصاف  پی ٹی آئی  کے سیکریڑی جنرل سلمان اکرم راجہ نے سول سیکریڑیٹ پشاور میں نیوز کانفرنس کرتے ہوئے کہا کہ دو سرکاری ملازمین کی شہادتوں پر قوم کے منتخب نمائندوں کو 10، 10 سال کی قید کی سزائیں دی گئیں جو کہ غلط ہے۔ 

انہوں نے اسے عدالتی تاریخ کا تاریک دن قرار دیتے ہوئے کہا کہ ایسی سزائیں کسی ملک میں نہیں دی جاتی ، سلمان اکرم راجہ نے کہا کہ اگرچہ وہ اپیل کریں گے لیکن26 ویں آئینی ترمیم کے بعد عدلیہ کی حالت سب پر واضح ہے۔ 
انہوں نے مزید کہا کہ یہ اقدامات عوام کو خوفزدہ کرنے کی سازش ہیں ، تاہم  پی ٹی آئی  آئین اور قانون کی جنگ جاری رکھے گی ، ہم بھاگنے والوں میں سے نہیں ، پاکستان کی بقا کی جنگ لڑ رہے ہیں۔ 

سلمان اکرم راجہ نے مظلوموں ، تیراہ کے بے گھر افراد اور بلوچستان کے عوام کے حقوق کی نمائندگی کرتے ہوئے کہا کہ 5 اگست کے خوف سے مقدمات بنائے جا رہے ہیں۔
 انہوں نے انکشاف کیا کہ وزیر اعلی سے ان کی بات چیت ہوئی ہے، جن کے مطابق مخصوص علاقوں میں کالعدم داعش اور ٹی ٹی پی کے لوگ موجود ہیں۔ 

وزیر اعلی نے بتایا کہ ان جنگجوئوں نے عام شہریوں کے گھروں میں پناہ لے رکھی ہے ، سلمان اکرم راجہ نے مطالبہ کیا کہ آپریشن صرف مقامی عوام کی اجازت اور مشاورت سے کیا جائے ۔

 
واضح رہے کہ  سلمان اکرم راجہ نے اعلان کیا کہ 5 اگست کو پی ٹی آئی ایک ملک گیر احتجاجی تحریک شروع کرے گی ۔