پاکستان اور یو اے ای کے درمیان ویزا فری انٹری سمیت کئی معاہدوں پر دستخط

پاکستان اور متحدہ عرب امارات (یو اے ای) کے درمیان مصنوعی ذہانت، مشترکہ سرمایہ کاری ٹاسک فورس، اور ویزا فری انٹری سمیت متعدد اہم معاہدوں پر دستخط ہو گئے۔

ترجمان دفتر خارجہ کے مطابق، پاکستان-یو اے ای مشترکہ وزارتی کمیشن کا 12واں اجلاس ابوظہبی میں منعقد ہوا، جس کی صدارت وزیر خارجہ اسحٰق ڈار اور ان کے اماراتی ہم منصب شیخ عبداللہ بن زاید النہیان نے مشترکہ طور پر کی۔

اجلاس میں دفاع، تجارت، توانائی، آئی ٹی، تعلیم، صحت، خوراک، موسمیاتی تبدیلی، ریلوے اور افرادی قوت سمیت مختلف شعبہ جات میں دوطرفہ تعاون کو مزید وسعت دینے پر اتفاق کیا گیا۔
دونوں ممالک نے بین الوزارتی روابط کو فروغ دینے کے عزم کا اعادہ بھی کیا۔

اجلاس کے دوران اہم معاہدوں پر دستخط کیے گئے ۔ 

• ڈپلومیٹک ویزا پر استثنیٰ

• ویزا فری انٹری

• مشترکہ سرمایہ کاری ٹاسک فورس کا قیام

• مصنوعی ذہانت کے شعبے میں دوطرفہ تعاون

شامل ہیں۔

اجلاس کے اختتام پر یہ فیصلہ بھی کیا گیا کہ پاکستان-یو اے ای مشترکہ وزارتی کمیشن کا آئندہ (13واں) اجلاس پاکستان میں منعقد ہوگا۔