سندھ میں آج بھی ظلم ہو رہا ہے، قانون کی حکمرانی نہیں،اسد عمر

وفاقی وزیر منصوبہ بندی اسد عمر کا ایک بیان میں کہنا  ہے کہ   سندھ کے دیگر اضلاع کے لیے بھی ترقیاتی پیکج زیر غور ہے، پی ٹی آئی حکومت نے بلوچستان کے لیے تاریخی پیکج دیا، کراچی کے لیے اربوں روپے کے پیکج کا اعلان کیا، وزیراعظم نے پسماندہ علاقوں کی ترقی کو ترجیح دی ہے۔ اسد عمر نے کہا کہ   سندھ میں عوام کے مسائل حل ہوتے ہوئے مجھے تو نظر نہیں آتے، پچھلے 12 سال سے مسلسل سندھ میں پیپلز پارٹی کی حکومت ہے، بدقسمتی سے سندھ کو جو لیڈر شپ ملی اس نے اپنی زندگی بہتر کی،انھوں نے سرے میں محل بنائے، ابوظہبی میں بھی محل بنا لیے لیکن سندھ کے عوام کے لیے کام نہیں کیا۔

وفاقی وزیر  اسد عمر نے کہا کہ   عمران خان نے تو کوئی محل نہیں بنانا اس لیے عمران خان سندھ کے عوام کی توقع پر پورا اتریں گے، عوام ووٹ صرف ترقیاتی کاموں پر نہیں ڈالتی۔ لوگ کہتے ہیں کہ خان صاحب کی نیت اچھی ہے لیکن عوام کے ذہن سے ناواقف ہیں، پچھلے الیکشن میں ڈیڑھ کروڑ سے ذائد لوگوں نے عمران خان کو ووٹ ڈالا، میں سمجھتا ہوں کہ جتنا عمران خان لوگوں کو جانتا  ہے کوئی نہیں جانتا۔

 اسد عمر کا کہنا تھا کہ   سندھ میں آج بھی ظلم ہو رہا ہے، قانون کی حکمرانی نہیں ہے، وفاق کی ذمہ داری ہے کہ جس کیساتھ ذیادتی ہو رہی ہے ان کیساتھ کھڑا ہو، انشااللہ تعالی وزیراعظم جلد اندرون سندھ کا دورہ کریں گے۔