کراچی ٹیسٹ دوسرا روز، پاکستان کو جنوبی افریقہ پر 88 رنز کی برتری

تفصیلات کے مطابق نیشنل اسٹیڈیم کراچی میں کھیلے جانے والے  پاکستان جنوبی افریقہ پہلے ٹیسٹ کے دوسرے دن کا کھیل مکمل ہوگیا، دوسرے دن پاکستانی بلے باز جنوبی افریقہ کے بولرز پر حاوی رہے، پاکستان نے 8 وکٹوں کے نقصان پر 308رنز بنا لیے ۔

پاکستان کو جنوبی افریقہ پر 88 رنز کی برتری حاصل ہوگئی ۔ فواد عالم نے کیرئیر کی تیسری سنچری اسکور کی، 109 رنز بنا کر آؤٹ ہوئے جبکہ  فہیم اشرف 64، اظہر علی 51 اور محمد رضوان 33 رنز بنا کر آؤٹ ہوئے۔ حسن علی 11 اور نعمان علی 6 رنز بنا کر وکٹ پر موجود ہیں۔

اس سے قبل ٹیسٹ میچ کے پہلے روز جنوبی افریقہ نے ٹاس جیت کر پہلے بیٹنگ کا فیصلہ کیا تھا لیکن پروٹیز خلاف توقع بڑا اسکور کرنے میں ناکام رہے، جنوبی افریقہ  کی پوری ٹیم 220 رنز پر ڈھیر ہوگئی ۔ پاکستان کی جانب سے اسپنرز یاسر شاہ نے رنز دے کر 3 جب کہ ڈیبیو کرنے والے نعمان علی اور شاہین شاہ آفریدی نے 2،2 وکٹیں حاصل کیں۔220 رنز کے جواب میں پاکستانی کھلاڑی بھی زیادہ دیر وکٹ پر نہ ٹھہر سکے اور صرف 33 کے مجموعی اسکور پر پاکستان کے 4 کھلاڑی پویلین لوٹ گئے۔ عابد علی 4 ، عمران بٹ 9، بابر اعظم 7 اور شاہین آفریدی بغیر کوئی رن بنائے پویلین لوٹ گئے تھے۔