چین اور روس کا افغان سرزمین سے پنپتی دہشت گردی پر شدید تشویش کا اظہار

بیجنگ،ماسکو:چین اور روس نے افغان سرزمین سے پنپتی دہشتگردی پر شدید تشویش کا اظہار کرتے ہوئے اسے علاقائی اور عالمی سلامتی کیلئے بڑا خطرہ قرار دیا ہے۔ طالبان رجیم اپنے ناجائز تسلط کو برقرار رکھنے کیلئےعالمی دہشتگرد تنظیموں کی سرپرستی کا خطرناک کھیل کھیل رہی ہے۔

تفصیلات کے مطابق چینی صدر شی جن پنگ اور روسی صدر ولادیمیر پیوٹن کے درمیان ہونے والی ملاقات کے بعد مشترکہ اعلامیہ کے مطابق افغان سرزمین سے جنم لینی والی دہشت گردی اور انتہاء پسندی پڑوسی ممالک اور عالمی امن کے لیے خطرہ ہے۔

مشترکہ اعلامیے میں کہا گیا ہے کہ افغانستان میں پائیدار امن اور مستحکم سیاسی نظم کا فوری قیام ناگزیر ہے۔ دونوں ممالک نے عالمی برادری سے افغان سرزمین کو پڑوسی ممالک کیخلاف استعمال ہونے سے روکنے کیلئے تعاون بڑھانے پر زور دیا ہے۔

عالمی ماہرین کے مطابق طالبان رجیم کی جانب سے دہشتگرد گروہوں کی سرپرستی نہ صرف افغانستان بلکہ پورے خطے کے امن کے لیے ایک مستقل خطرہ بن چکی ہے۔

واضح رہے کہ  روس اور چین کا مشترکہ اعلامیہ افغان سرزمین پڑوسی ممالک کیخلاف دہشتگردی کیلئے استعمال ہونے سے متعلق پاکستان کے اصولی مؤقف کی تائید ہے۔