وزیراعظم شہباز شریف سے لیبیا کی اعلیٰ قیادت کی ملاقات، دوطرفہ تعاون اور تعلقات پر تبادلہ خیال

اسلام آباد:وزیراعظم محمد شہبازشریف سے لیبیاکے وزیراعظم ڈاکٹر اسامہ سعد حمد، فیلڈ مارشل خلیفہ ابو القاسم حفتر اورڈپٹی کمانڈر اِن چیف لیفٹیننٹ جنرل صدام خلیفہ حفتر نےاسلام آباد میں ملاقات کی جس میں دوطرفہ تعلقات اور باہمی تعاون پر تبادلہ خیال کیا۔

ملاقات میں نائب وزیرِاعظم محمد اسحاق ڈار اور فیلڈ مارشل سید عاصم منیر بھی ملاقات میں موجود تھے۔

دوران ملاقات وزیرِاعظم محمد شہباز شریف نے لیبیا کے ساتھ دوستانہ تعلقات کے فروغ کے لیے پاکستان کے عزم کا اعادہ کرتے ہوئےمسلسل روابط اور مکالمے کی اہمیت پر زور دیا۔

اس دوران لیبیا کی قیادت نے پاکستان کے کردار کو سراہتے ہوئے دونوں ملکوں کے درمیان تعاون کو وسعت دینے میں دلچسپی کا اظہار کیا۔

گفتگو کے دوران دونوں فریقوں کی طرف سے تعلقات مزید مضبوط بنانے کی اہمیت پر زور دیا گیا۔ اس بات پر اتفاق کیا گیا کہ قریبی روابط برقرار رکھتے ہوئےمستقبل میں تعاون کے مزید امکانات تلاش کیے جائیں گے۔

یہ ملاقات باہمی دلچسپی کے شعبوں میں تعاون کو فروغ دینے اور علاقائی و عالمی سطح پر امن، استحکام اور ترقی کو یقینی بنانے کے عزم کی عکاس ہے۔