قومی اسمبلی: بلوچستان میں دہشت گردی کے خلاف اورکشمیریوں سے اظہارِ یکجہتی کے حوالے سےقرارداد منظور

اسلام آباد: قومی اسمبلی نے بلوچستان میں دہشت گردی کے واقعات کے خلاف مذمتی قرارداد متفقہ طور پر منظور کرلی ہے، جس میں دہشت گردی کو ریاستی دباؤ کیلئےاستعمال کرنے کی سخت مخالفت کرتے ہوئے قانون نافذ کرنے والے اداروں اور صوبائی حکومت کو مؤثر اقدامات کی ہدایت کی گئی ہے۔

تفصیلات کے مطابق قومی اسمبلی کا اجلاس سپیکر سراد ایاز صادق کی زیر صدارت ہوا ۔ وزیر پارلیمانی امور ڈاکٹر طارق فضل چوہدری نے بلوچستان میں دہشت گردی کے واقعات کے خلاف مذمتی قرارداد پیش کی جس کو ایوان نے متفقہ طورپر منظور کرلیا۔

قرارداد میں دہشت گردی کے واقعات میں شہداء کے لواحقین اور زخمیوں سے مکمل یکجہتی کا اعلان کیا گیااوردہشت گردی کے خلاف زیرو ٹالرنس پالیسی پر عملدرآمد کا مطالبہ کیا گیا

دوران اجلاس بلوچستان کی صورتحال پر اظہار خیال کرتے ہوئے وزیر مملکت داخلہ طلال چوہدر ی نے کہاکہ ہشتگردی کی کو ئی مذہبی وابستگی نہیں ہوتی اور نہ ہی لسانی پہچان ہوتی ہے ۔طلال چوہدری نے کہاکہ دہشتگردوں نے بلوچستان کے معصوم لوگوں نشانہ بنایا۔

علاوہ ازاں اجلاس میں مقبوضہ جموں و کشمیر کی موجودہ صورتحال پر متفقہ قرارداد منظور کر لی گی۔ قرارداد کشمیر کمیٹی کے چیئرمین رانا قاسم نون نے پیش کی، جس میں بھارت کی جانب سے مقبوضہ کشمیر میں جاری انسانی حقوق کی سنگین اور منظم خلاف ورزیوں کی بھرپور مذمت کی گئی۔

قرارداد میں کہا گیا کہ ایوان بھارتی مظالم اور انسانی حقوق کی خلاف ورزیوں، بھارتی فورسز کی مقبوضہ کشمیر میں مظالم اور بربریت اور بھارت کی جانب سے 5 اگست 2019ء کے غیر قانونی یک طرفہ اقدام کی مذمت کرتا ہے۔

قرارداد میں مطالبہ کیا گیا کہ بھارت 5 اگست 2019ء کے اقدام کو فوری واپس لے، عالمی برادری مقبوضہ کشمیر میں انسانی حقوق کی خلاف ورزیوں کا نوٹس لے، عالمی برادری جموں و کشمیر تنازع کے حل میں فعال کردار ادا کرے۔

قومی اسمبلی کے اجلا س کی کارروائی چھ فروری تک ملتوی ہوگئی۔