کشمیریوں کا بھارتی جارحیت کیخلاف پیر کو دنیا بھر میں یوم سیاہ منانے کا اعلان

مطفر آباد: کشمیریوں نے بھارتی جارحیت کے خلاف کل پیر کو دنیا بھر میں یوم سیاہ منانے کا اعلان کر دیا۔

تفصیلات کے مطابق کل جماعتی حریت کانفرنس کے رہنما غلام محمد صفی نے پریس کانفرنس کرتے ہوئے کہا کہ لائن آف کنٹرول (ایل او سی) کے دونوں اطراف پاکستان سمیت دنیا بھر میں رہائش پذیر کشمیری بھارتی جارحیت کے خلاف یوم سیاہ منائیں گے۔

پریس کانفرنس میں انہوں نے کہا کہ 27 اکتوبر 1947 کو بھارت نے مقبوضہ جموں و کشمیر میں اپنی فوجیں اتاری تھیں۔ اور ریاست جموں و کشمیر کے بڑے حصے پر ناجائز قبضہ کیا۔

ان کا مزید کہنا تھا کہ بھارت کے ناجائز قبضے کے خلاف کشمیری سراپا احتجاج ہیں۔ اور بھارتی قبضے کے خلاف کل پیر کو یوم سیاہ منایا جائے گا۔

پریس کانفرنس کے دوران انہوں نے اقوام عالم سے مطالبہ کیا کہ کشمیریوں سے کیے گئے وعدے پر عملدرآمد کروایا جائے۔ جب تک مقبوضہ کشمیر سے آخری بھارتی فوجی کا انخلا نہیں ہو جاتا آزادی کی جدوجہد جاری رہے گی۔

کشمیری رہنما نے کہا کہ یوم سیاہ کے موقع پر مظفر آباد میں بڑی احتجاجی ریلی نکالی جائے گی۔ اور اقوام متحدہ سے قراردادوں پر عملدرآمد کا مطالبہ کیا جائے گا۔