پی ایس ایل 11 میں کتنے میچز ہونگے اور کہاں کہاں کھیلے جائیں گے؟ تفصیلات سامنے آگئیں

لاہور:پاکستان سپر لیگ (پی ایس ایل) کے گیارہویں ایڈیشن کے میچز کی تفصیلات سامنے آگئیں۔

تفصیلات کے مطابق پی ایس ایل کا گیارہواں ایڈیشن 26 مارچ سے 3 مئی 2026ء تک منعقد ہوگا، ایونٹ میں اس بار 6 سے بڑھ کر 8 ٹیمیں ایکشن میں ہوں گی  تاہم ٹیموں کو کم سے کم 10 ہی میچ کھیلنے کو ملیں گے۔ 

اس سے قبل ایونٹ میں جب 6 ٹیمیں کھیلا کرتی تھیں ، تب ہی کم سے کم 10 ہی میچ انھیں کھیلنے کو ملا کرتے تھے۔ 

اس حوالے سےپاکستان سپر لیگ کی انتظامیہ کے پاس میچوں کے حوالے سے 2 آپشنز تھے،اگر وہ ڈبل لیگ کی بنیاد پر ایونٹ کا انعقاد کرتے تو 60 میچ ہونا تھے، البتہ سیزن “الیون” کے لیے 39 دن کی ونڈو میں ایسا ہونا ممکن نہیں ، لہذا ایونٹ کے فارمیٹ کے مطابق پہلے مرحلے میں جو سنگل لیگ کی بنیاد پر ہوگا، ہر ٹیم ایک ایک میچ کھیلے گی۔

دوسرے مرحلے میں 8 ٹیموں کو 4-4 کے دو گروپس میں تقسیم کیا جائیگا، جہاں ہر ٹیم کو تین تین میچ کھیلنے کو ملیں گے، اور اس مرحلے میں 12 میچز منعقد ہوں گے،سپر فور مرحلے کی 2 ٹاپ ٹیمیں پلے آف کے لیے کوالیفائی کریں گی، جہاں فائنل کے ساتھ چار میچ کھیلے جائیں گے۔

پاکستان سپر لیگ 2026 کے میچ کراچی، لاہور، راولپنڈی ، ملتان اور پہلی بار اقبال اسٹیڈیم فیصل آباد میں کھیلے جائیں گے۔