برطانیہ میں سیاسی پناہ کے خواہش مند افراد میں پاکستانی پہلے نمبر پر آگئے

لندن:برطانیہ میں سیاسی پناہ حاصل کرنے کے خواہش مند افراد میں پاکستانی پہلے نمبر پر آ گئے۔
برطانوی وزارت داخلہ کے تازہ اعداد و شمار کے مطابق، گزشتہ برس 11 ہزار 48 پاکستانی شہریوں نے سیاسی پناہ کی درخواستیں جمع کرائیں، جو مجموعی طور پر 1 لاکھ 9 ہزار 343 درخواستوں کا ایک بڑا حصہ ہے۔
برطانیہ کے ہوم آفس کے مطابق، 2023-24 میں پاکستانی تیسرے سب سے زیادہ عام پناہ کے متلاشی تھے۔
اس کے علاوہ چھوٹی کشتیوں میں سمندر عبور کر کے برطانیہ میں سیاسی پناہ حاصل کرنے والوں کا تناسب 33 فیصد تھا۔
برطانیہ کے ہوم آفس کے مطابق مارچ کو ختم ہونے والے سال میں افغان باشندے دوسرے سب سے زیادہ عام پناہ کے متلاشی تھے، جن کی تعداد 8,069 تھی۔
ماہرین کے مطابق، پاکستانی شہریوں کی بڑھتی ہوئی تعداد کئی عوامل کا نتیجہ ہوسکتی ہے، جن میں ملک میں معاشی عدم استحکام، سیاسی کشیدگی اور روزگار کے محدود مواقع شامل ہیں،یہ اعداد و شمار نہ صرف پاکستان بلکہ پورے خطے کے سماجی و اقتصادی حالات پر ایک اہم تبصرہ پیش کرتے ہیں۔
برطانوی حکام کا کہنا ہے کہ وہ ہر درخواست کا انفرادی طور پر جائزہ لیں گے اور انصاف پسندی سے فیصلہ کریں گے۔
 تاہم، یہ اعداد و شمار یورپی ممالک کے لیے مہاجرت کے بحران سے نمٹنے کے لیے جامع پالیسیاں بنانے کی ضرورت کو بھی اجاگر کرتے ہیں۔