پنڈی ٹیسٹ، پاکستان کا جنوبی افریقہ کے خلاف پہلے بیٹنگ کا فیصلہ

پنڈی کرکٹ اسٹیڈیم میں کھیلے جا رہے پاکستان اور ساؤتھ افریقہ کے مابین دوسرے ٹیسٹ میچ میں قومی ٹیم کے کپتان بابر اعظم نے ٹاس جیت کر پہلے بیٹنگ کا فیصلہ کیا۔ اس موقع پر قومی ٹیم کے کپتان بابراعظم نے کہا کہ دوسرے ٹیسٹ کیلئے ٹیم میں کوئی تبدیلی نہیں کی گئی،وکٹ کافی ڈرائی لگ رہی ہے،دو صفر سے سیریز جیتنا چاہتے ہیں ۔انہوں نے کہاکہ کوشش کریں گے آغاز اچھا کریں۔دوسری جانب جنوبی افریقہ کی ٹیم میں ایک تبدیلی کی گئی ہے ، جنوبی افریقہ کے کپتان ڈی کاک کا کہنا تھا کہ وکٹ پرتھوڑی گھاس ہے ابتدا میں بولرز کو مد د کرے گی۔ 

واضح رہے کہ جنوبی افریقا 24 سال بعد پنڈی کرکٹ اسٹیڈیم میں آج ٹیسٹ میچ کھیلے گا، میچ سے قبل دونوں ٹیمیں سیکیورٹی کے سخت انتظامات کیساتھ پنڈی اسٹیڈیم پہنچیں ،ٹیموں کے سفر کے دوران جڑواں شہروں میں میٹرو بس سروس معطل رکھی گئی۔انتظامیہ کے مطابق ٹیسٹ میچ کے سبب اسلام آباد اور پنڈی کے درمیان مخصوص اوقات میں میڑو بس سروس بند رکھنے کا فیصلہ کیا گیا ہے۔انتظامیہ کا کہنا ہے کہ بس سروس آپریشن آج صبح 8.30 سے 10 بجے تک معطل رہے گا، جبکہ شام5:30 سے 7 بجے تک بھی بس سروس معطل رہے گی۔انتظامیہ میٹرو بس کے مطابق دیگر اوقات میں میڑو بس معمول کے مطابق چلے گی، تاہم شمس آباد اسٹیشن تمام دن مکمل بند رہے گا۔