ٹرمپ نے ایران کے پُلوں اور بجلی گھروں کو نشانہ بنانے پر غور شروع کردیا،امریکی میڈیا 

واشنگٹن ڈی سی:امریکی صدر ڈونلڈ ٹرمپ نے  ایران کے انفراسٹرکچر پر نئے حملوں کے بارے میں غور شروع کردیا۔

تفصیلات کے مطابق امریکی نشریاتی ادارے فوکس نیوز نے ٹرمپ کے ٹیلیفونک انٹرویو کا حوالہ دیتے ہوئے کہا ہے کہ  وہ ایران کے بجلی گھروں اور پلوں پر نئے حملوں کا حکم دے سکتے ہیں کیونکہ ایران معاہدہ کرنے میں تاخیر کر رہا ہے۔

خیال رہے کہ اس سے قبل ٹرمپ نے اپنے سوشل میڈیا پلیٹ فارم ٹروتھ سوشل پر بیان دیتے ہوئے کہا کہ ’ایران کی فوج مکمل طور پر تباہ و برباد ہو چکی ہے۔ اس کے بہت سے حصے، جیسے بحریہ اور فضائیہ، اب عملاً موجود ہی نہیں رہے، انہیں مکمل طور پر شکست دی جا چکی ہے‘۔

جاری بیان میں امریکی صدر نے مزید کہا کہ ’ایران صرف باتیں کرتا ہے، عملی اقدام کچھ نہیں کرتا۔ مشرقِ وسطیٰ کا یہ غنڈہ اب ختم ہو چکا ہے‘۔

امریکی صدر کا کہنا تھا کہ ’ایران نے ایسے معاہدے پر مذاکرات کرنے میں بہت زیادہ دیر کر دی جو ان کے لیے بہترین ثابت ہو سکتا تھا،اب انہیں اس کی قیمت چکانا پڑے گی‘۔