قابض افغان رجیم کی ریاستی دہشتگردی جاری ، پوست کے خاتمے کے نام پر نہتے شہریوں کا قتلِ عام

کابل:افغانستان پر قابض طالبان رجیم اپنے ہی عوام کی دشمن بن گئی ہے اور نہتے شہریوں پر طاقت کا بے دریغ استعمال جاری ہے۔ افغان طالبان رجیم طاقت کے ناجائز استعمال کے ذریعے شہریوں کے اثاثوں پر بھی قبضہ کرنے لگی ہے۔

افغان جریدے “افغان انٹرنیشنل” کے مطابق صوبہ بدخشاں کے ضلع ارگو میں وسائل پر قبضے کے تنازع پر طالبان اور مقامی رہائشیوں کے درمیان جھڑپیں جاری ہیں۔

جریدے کی رپورٹ کے مطابق جھڑپوں کے دوران طالبان فورسز کی براہِ راست فائرنگ سے دو شہری جاں بحق ہوگئے۔ “افغان انٹرنیشنل” نے خدشہ ظاہر کیا ہے کہ احتجاج کی شدت میں مسلسل اضافے کے باعث ہلاکتوں کی تعداد مزید بڑھ سکتی ہے۔

جاری رپورٹ میں یہ بھی کہا گیا ہے کہ طالبان رجیم نے اپنے مبینہ وحشیانہ مظالم کو چھپانے کے لیے بدخشاں میں موبائل سروس بھی معطل کردی ہے۔

ماہرین کے مطابق طالبان فورسز کے ہاتھوں شہریوں کی ہلاکت نے ثابت کردیا ہے کہ قابض رجیم میں افغان عوام محفوظ نہیں رہے،اس حوالے سے ماہرین کا مزید کہنا ہے کہ افغان طالبان انسدادِ منشیات کے نام پر لوٹ مار کے ذریعے منشیات کے مکروہ دھندے کو مزید وسعت دے رہے ہیں۔