پاکستان نے مذاکرات کے دوران ایران کے خلاف فوجی کارروائی نہ کرنے کی درخواست کی ،ٹرمپ

واشنگٹن: امریکی صدر ڈونلڈ ٹرمپ نے کہا ہے کہ پاکستان نے امریکہ سے درخواست کی تھی کہ ایران کے ساتھ جنگ کے خاتمے کے لیے جاری مذاکرات کے دوران ایران کے خلاف کوئی فوجی کارروائی نہ کی جائے۔

برطانوی خبر ایجنسی کے مطابق یہ بیان آبنائے ہرمز میں دونوں جانب سے فائرنگ کے تبادلے کے بعد سامنے آیا۔
رپورٹس کے مطابق صدر ٹرمپ نے کہا کہ آپ جانتے ہیں پاکستان شاندار رہا ہے، اور اُن کے فیلڈ مارشل اور وزیرِاعظم کی قیادت بھی شاندار رہی، اُنہوں نے ہم سے کہا کہ ہم یہ کارروائی نہ کریں، اگر ضرورت پڑی تو ہم دوبارہ اس طرف جائیں گے، اُنہوں نے مذاکرات کے دوران ہم سے یہ نہ کرنے کی درخواست کی تھی۔

ٹرمپ نے کہا کہ ایران کے ساتھ جنگ بندی اب بھی برقرار ہے، حالانکہ ایران نے تین امریکی ڈسٹرائرز پر حملہ کیا تھا۔

اس سے قبل امریکی فوج کے سینٹرل کمانڈ (سینٹ کام ) کا کہنا تھا کہ مسلح افواج نے جواب میں ایرانی فوجی اہداف پر حملے کیے، جبکہ تہران کا مؤقف ہے کہ فائرنگ کے تبادلے کا آغاز واشنگٹن کی جانب سے کیا گیا۔

دوسری طرف ایران کے سرکاری میڈیا نے بتایا کہ ملک کی مسلح افواج نے آبنائے میں واقع جزیرہ قشم پر دشمن کے ساتھ فائرنگ کا تبادلہ کیا، خلیج فارس میں واقع یہ ایران کا سب سے بڑا جزیرہ ہے، جہاں تقریباً ایک لاکھ 50 ہزار افراد آباد ہیں، یہاں سمندری پانی کو میٹھا بنانے کا پلانٹ بھی موجود ہے۔

علاوہ ازا ں ایرانی سرکاری میڈیا نے مغربی تہران میں بھی زور دار آوازیں سنائی دینے اور دفاعی فائرنگ کی اطلاع دی، ایران کی نیم سرکاری خبر رساں ایجنسیوں فارس اور تسنیم کے مطابق، جنوبی ایران میں بندر عباس کے قریب دھماکوں کی آوازیں سنی گئیں، رپورٹس میں ان دھماکوں کی وجہ کی نشاندہی نہیں کی گئی۔