وزیر اعظم کا قطری ہم منصب سے ٹیلیفونک رابطہ،خطے کی موجودہ صورتحال پر تفصیلی تبادلۂ خیال 

اسلام آباد:وزیراعظم محمد شہباز شریف اور قطر کے وزیراعظم و وزیر خارجہ شیخ محمد بن عبدالرحمن بن جاسم الثانی کے درمیان ٹیلیفونک گفتگو میں خطے کی موجودہ صورتحال پر تفصیلی تبادلۂ خیال کیا گیا ۔

وزیر اعظم ہاؤس کی جانب سے جاری کردہ بیان کے مطابق ٹیلیفونک رابطے میں فریقین نے خطے میں پائیدار امن کے لیے جاری سفارتی کوششوں کو آگے بڑھانے کے عزم کا اعادہ کیا ۔

بیان کے مطابق ا پنے حالیہ قطر کے دورے کا ذکر کرتے ہوئے وزیراعظم نے کہا کہ امیرِ قطر شیخ تمیم بن حمد الثانی اور قطری قیادت کے ساتھ ملاقاتیں خطے میں امن کے فروغ کے لیے نہایت مفید ثابت ہوئیں ۔پاکستان کے عوام امیرِ قطر کے جلد پاکستان کے دورے کے منتظر ہیں۔

قطر کے وزیراعظم نے خطے میں امن و استحکام کے فروغ کے لیے پاکستان کی مسلسل کوششوں کو سراہتے ہوئے وزیر اعظم محمد شہباز شریف کو یقین دلایا کہ قطر ان سفارتی کوششوں کی مکمل حمایت جاری رکھے گا۔

بیان میں مزیدکہا گیا ہے کہ دونوں رہنماؤں نے قریبی رابطے اور مشاورت جاری رکھنے پر اتفاق کیا۔