صاحبزادہ فرحان آئی سی سی پلیئر آف دی منتھ قرار، پی سی بی چیئر مین کی مبارکباد

دبئی:حالیہ ٹی ٹوئنٹی ورلڈ کپ میں دو شاندار اسنچریوں کی بدولت سب سے زیادہ رنز اسکور کرنے ولے پاکستا ن ٹیم کے اوپنر صاحبزادہ فرحان نے آئی سی سی پلیئر آف دی منتھ کا اعزاز اپنے نام کر لیا۔

آئی سی سی کے مطابق پاکستان کے اوپنر صاحبزادہ فرحان کو فروری 2026 کے لیے آئی سی سی مینز پلیئر آف دی منتھ کے اعزاز سے نوازا گیا ہے.

دوسری جانب پی سی بی چیئر مین محسن نقوی نے ایوارڈ جیتنے پرفرحان کو مبارکباد دینے کے ساتھ نیک خواہشات کا اظہار کیا ہے۔

چیئرمین پی سی بی محسن نقوی نے کہا ہے کہ صاحبزادہ فرحان کا اعزاز پاکستان کرکٹ کے لئے باعث فخر ہے۔یہ اعزاز صاحبزادہ فرحان کی محنت اور پروفیشنل اپروچ کا نتیجہ ہے۔

خیال رہے کہ دائیں ہاتھ کے بلے باز صاحبزادہ فرحان نے میگا ایونٹ کی صرف 6 اننگز میں 76.60 کی شاندار اوسط اور 160.25 کے اسٹرائیک ریٹ کے ساتھ مجموعی طور پر 383 رنز بنائے، جو ٹورنامنٹ میں سب سے زیادہ تھے۔

پاکستانی بلے باز کی ٹورنامنٹ میں 2 سینچریاں اور 2 نصف سنچریاں شامل تھیں اور وہ ٹی 20 ورلڈ کپ کے ایک ہی ایڈیشن میں ایک سے زائد سینچری بنانے والے پہلے کھلاڑی بن گئے۔ 

اس دوران انہوں نے ویرات کوہلی کا طویل عرصے سے قائم ریکارڈ توڑ کر ایک ہی ایڈیشن میں سب سے زیادہ رنز بنانے کا اعزاز بھی حاصل کیا،29سالہ فرحان نے اپنی ٹیم کے ساتھی فخر زمان کے ساتھ ٹی 20 انٹرنیشنل کی تاریخ میں سب سے بڑی پارٹنرشپ (176 رنز) بھی قائم کی۔

حالانکہ پاکستان سیمی فائنل میں پہنچنے میں کامیاب نہ ہو سکا لیکن فرحان کی شاندار کارکردگی نے انہیں آئی سی سی ٹیم آف دی ٹورنامنٹ میں جگہ دلوائی۔