جنگ کا خطرہ ٹل گیا،جنیوا مذاکرات میں ایران اور امریکا نےمعاہدے کے اصولوں پر اتفاق کر لیا

جینوا:ایران اور امریکا نے جنیوا میں ہونے والے جوہری مذاکرات میں معاہدے کے اہم اصولوں پر اتفاق کر لیا، جس کے بعد مشرقی وسطحی میں بڑھتی ہوئی کشیدگی میں بھی واضح کمی کا امکان ہے۔

غیر ملکی میڈیا رپورٹس کے مطابق ایرانی وزیر خارجہ عباس عراقچی کا کہنا ہےکہ جلد کسی معاہدے پر پہنچنے کا امکان نہیں لیکن عملی شروعات ہوگئی ہیں، دونوں فریقین ممکنہ معاہدے کی دستاویزات پر کام کریں گے اور ان کا تبادلہ کریں گے۔

رپورٹس کے مطابق ایرانی وزیر خارجہ کا مزید کہنا تھا کہ امریکا کی جانب سے طاقت کے استعمال کا واضح حوالہ فوری اور غیر مشروط طور ختم ہونا چاہئے، مذاکرات میں امریکی وفد کی نمائندگی اسٹیو وٹکوف اور جیرڈ کشنر نے کی۔

علاوہ ازاں اس حوالے سےایرانی سپریم لیڈرآیت اللہ علی خامنہ ای کا کہنا ہے کہ مذاکرات کے نتائج پہلے سے طے کرنا احمقانہ ہے، ایران کی پُرامن جوہری صنعت جنگ کے لیے نہیں ملک چلانے کے لیے ہے۔

دوسری جانب خلیجی عرب ممالک نے بھی خبردار کیا ہے کہ کسی ممکنہ فوجی کارروائی سے خطے میں نئی جنگ چھڑ سکتی ہے،عمانی وزیر خارجہ بدر البوسعیدی نے کہا امریکا اور ایران اگلی ملاقات سے پہلے واضح اقدامات کے ساتھ گئے ہیں۔

خیال رہے کہ اس سے قبل امریکی صدر ڈونلڈ ٹرمپ ایران کو جوہری پروگرام پر طاقت کے استعمال کی دھمکی دیتے رہے ہیں، جبکہ تہران کا کہنا ہے کہ کسی بھی حملے کا جواب دیا جائے گا۔