مسلسل کئی دنوں کے اضافے کے بعد سونا ہزاروں روپے سستا، فی تولہ کتنے کا ہو گیا؟

کراچی : مسلسل کئی دنوں کے اضافے کے بعد عالمی ومقامی مارکیٹوں میں سونے کی قیمت میں نمایاں کمی ریکارڈ گئی۔

آل پاکستان جیمزا ینڈ جیولرز ایسوسی ایشن کے مطابق کاروباری ہفتے کے پہلے 24 گرام سونے کی فی تولہ قیمت میں 5ہزار 500روپے کمی ریکارڈ کی گئی جس کے بعد سونے کی نئی قیمت کم ہو کر 4لاکھ 70ہزار 162روپے کی سطح پر آگئی۔

ایسوسی ایشن کے مطابق اسی طرح فی دس گرام سونے کی قیمت بھی 4ہزار 715روپے کی کمی سے 4لاکھ 03ہزار 088روپے کی سطح پر آگئی۔

دوسری جانب عالمی بلین مارکیٹ میں 6روزہ طویل دورانیے کے بعد پیر کو فی اونس سونے کی قیمت 55ڈالر کی کمی سے 4ہزار 478ڈالر کی سطح پر آگئی۔ 
اسی طرح فی تولہ چاندی کی قیمت 332روپے کی کمی سے 8ہزار 075روپے اور فی دس گرام چاندی کی قیمت بھی 284روپے کی کمی سے 6ہزار 923روپے کی سطح پر آگئی ہے۔