پنجاب ہیلتھ کیئر کمیشن نے نجی اسپتالوں میں سی سی ٹی وی کیمرے لازمی قرار دے دیے

لاہور: پنجاب ہیلتھ کیئر کمیشن نے صوبے بھر کے نجی اسپتالوں کو ہدایت کی ہے کہ مریضوں کی شکایات کے مؤثر حل اور نگرانی کے نظام کو بہتر بنانے کے لیے اہم مقامات پر سی سی ٹی وی کیمرے نصب کیے جائیں۔

تفصیلات کے مطابق کمیشن کی جانب سے جاری مراسلے کے مطابق ایمرجنسی، آئی سی یو، نرسری، ویٹنگ ایریاز، داخلی راستوں اور راہداریوں میں فعال کلوزڈ سرکٹ کیمرے لگائے جائیں۔ اس کا مقصد اسپتالوں میں شفافیت اور مریضوں کو بہتر سہولیات فراہم کرنا ہے۔

مراسلے میں مزید کہا گیا ہے کہ تمام ریکارڈ شدہ فوٹیج کو کم از کم 40 دن تک محفوظ رکھا جائےجبکہ سی سی ٹی وی ریکارڈنگ صرف قانونی تقاضوں کی صورت میں متعلقہ اداروں کے حوالے کی جائے گی۔

ہیلتھ کیئر کمیشن نے اسپتال انتظامیہ کو ہدایت دی ہے کہ کیمرے نصب کرتے وقت مریضوں کی پرائیویسی کو ہر حال میں یقینی بنایا جائے تاکہ علاج معالجے کے دوران کسی کو بھی غیر ضروری پریشانی کا سامنا نہ کرنا پڑے۔