راولپنڈی: جرگے کے فیصلے پر خاتون کا قتل، رکشہ ڈرائیور کا عدالت میں اعترافِ جرم

راولپنڈی : غیرت کے نام پر شادی شدہ خاتون سدرہ بی بی کے قتل کیس میں اہم پیش رفت سامنے آئی ہے۔

تفصیلات کے مطابق رکشہ ڈرائیور خیال محمد نے عدالت کے روبرو دفعہ 164 کے تحت بیان قلمبند کراتے ہوئے اعترافِ جرم کر لیا اور وعدہ معاف گواہ بننے پر آمادگی ظاہر کی۔

خیال محمد نے ابتدائی طور پر مرکزی ملزمان کے ساتھ تعاون کیا اور مقتولہ کی لاش کو ملزم مانی گل کے لوڈر رکشے میں منتقل کرنے میں مدد دی تھی۔

کیس کی سماعت ڈیوٹی سول جج ثمرہ نے کی، جس میں پولیس نے گرفتار چھ ملزمان کے جسمانی ریمانڈ میں سات روز کی توسیع کی درخواست کی۔ تاہم عدالت نے یہ درخواست جزوی طور پر منظور کرتے ہوئے تمام ملزمان کو چار روزہ جسمانی ریمانڈ پر پولیس کے حوالے کرنے کا حکم دیا اور 4 جولائی کو دوبارہ عدالت میں پیش کرنے کی ہدایت کی۔

سماعت کے دوران عدالت نے ملزمان کے چہروں پر سیاہ کپڑا ڈالنے پر سوال اٹھایا، جس پر پولیس نے مؤقف اختیار کیا کہ کیس ہائی پروفائل ہے اور میڈیا کی موجودگی کے باعث یہ اقدام کیا گیا۔ عدالت نے اس وضاحت کو مسترد کرتے ہوئے تمام ملزمان کے چہروں سے پردہ ہٹانے کا حکم دیا۔

پولیس نے عدالت کو مزید بتایا کہ قتل میں استعمال ہونے والا تکیہ ابھی تک برآمد نہیں ہوا اور اس حوالے سے تفتیش جاری ہے۔

عدالت نے رکشہ ڈرائیور خیال محمد کو جوڈیشل ریمانڈ پر جیل بھجوانے جبکہ باقی تمام ملزمان کو جسمانی ریمانڈ پر پولیس کے حوالے کرنے کا حکم جاری کر دیا۔