ٹیکس فراڈ کے مخصوص کیسز پر ہی گرفتاری کی جائے گی : وزیر مملکت خزانہ 

وزیر مملکت برائے خزانہ بلال اظہر کیانی نے واضح کیا ہے کہ ٹیکس فراڈ کے مخصوص کیسز پر ہی گرفتاری ہوگی۔

قومی اسمبلی کے اجلاس میں اظہار خیال کرتے ہوئے وزیر مملکت برائے خزانہ اور وزیر اعظم ڈیلیوری یونٹ کے سربراہ بلال اظہر کیانی نے کہا کہ ٹیکس فراڈ کے مخصوص کیسز  پر ہی گرفتاری ہوگی جس کا فیصلہ ایف بی آر ممبر بورڈ کی 3 رکنی کمیٹی کرے گی۔

بلال اظہر کیانی نے کہاکہ انکوائری کے مرحلے پر کوئی گرفتاری نہیں ہوگی،ٹیکس فراڈ پر ایف بی آر کو گرفتاری کا اختیار پہلے ہی حاصل تھا۔
وزیر مملکت برائے خزانہ کاکہنا تھاکہ وزیر اعظم کی ہدایت پر شہریوں کے تحفظ کےلیے خصوصی اقدامات کیے ہیں۔

وزیر مملکت برائے خزانہ بلال اظہر کیانی نے بتایاکہ پہلے سرکاری حکام کسی بھی کاروباری شخصیت کو گرفتار کرسکتے تھے،حکومت نے یہ اختیار ختم کرنے کی تجویز پیش کی ہے،مالی سال 25-2024 میں معاشی استحکام حاصل کیا اور آئی ایم ایف شرائط پوری کرتےہوئے عوام کو ریلیف بھی دیا۔

وزیر مملکت بلال اظہر کیانی نے کہاکہ مقامی صنعت کی ترقی کےلیے خام مال اور مشینری  کی قیمت میں کمی کے اقدامات کررہے ہیں،معاشی قدغن کے باوجود بےنظیر انکم سپورٹ پروگرام کے بجٹ کو 592 ارب روپے سے بڑھاکر 716 ارب روپے کردیا گیا ہے۔

انہوں نے کہاکہ بےنظیر انکم سپورٹ پروگرام کے تحت حکومت ایک کروڑ مستحق خاندانوں کی مدد کرسکے گی،وزیر اعظم کے وژن کےمطابق سالانہ 6 سے 12 لاکھ روپے کمانے والوں کے آمدنی ٹیکس 5 فیصد سے کم کرکے 1 فیصد کرنے کی تجویز پیش کی گئی ہے۔