ہولناک حادثہ، ایک ہی خاندان کے 10 افراد جاں بحق

لاہور: صوبائی دارالحکومت لاہور کے علاقے باغبانپورہ، سکھ نہر کے قریب مکان کی چھت گرنے سے دلخراش حادثہ پیش آیا، جس کے نتیجے میں 10 افراد جاں بحق جبکہ 3 افراد زخمی ہوگئے۔

ریسکیو حکام کے مطابق چھت گرنے کے فوراً بعد امدادی ٹیمیں موقع پر پہنچ گئیں اور ملبے تلے دبے افراد کو نکالنے کے لیے آپریشن شروع کیا۔ زخمیوں کو ابتدائی طبی امداد کے بعد قریبی اسپتال منتقل کردیا گیا، جبکہ ملبہ ہٹانے کا کام جاری ہے۔

حکام کا کہنا ہے کہ جاں بحق افراد کی شناخت اور حادثے کی وجوہات جاننے کے لیے تحقیقات بھی شروع کردی گئی ہیں۔

وزیراعلیٰ پنجاب مریم نواز نے واقعے پر گہرے دکھ اور افسوس کا اظہار کرتے ہوئے قیمتی انسانی جانوں کے ضیاع پر اہلِ خانہ سے تعزیت کی ہے۔ انہوں نے متعلقہ حکام کو زخمیوں کو بہترین طبی سہولتیں فراہم کرنے اور واقعے کی رپورٹ پیش کرنے کی ہدایت بھی جاری کی۔

دوسری جانب فیصل آباد میں بھی بارش کے دوران ایک مکان کی چھت گرنے سے 2 بچے جاں بحق جبکہ 2 افراد زخمی ہوگئے، جس کے بعد حالیہ بارشوں میں بوسیدہ عمارتوں کی حفاظت سے متعلق خدشات ایک بار پھر شدت اختیار کر گئے ہیں۔