پی ایس ڈی ایف اور ایف پی سی سی آئی کا صنعتی ضروریات سے ہم آہنگ ہنرمندی کے فروغ کے لیے اشتراک

لاہور: پنجاب سکلز ڈویلپمنٹ فنڈ (PSDF) اور فیڈریشن آف پاکستان چیمبرز آف کامرس اینڈ انڈسٹری (FPCCI) نے صنعتوں کی ضروریات کے مطابق ہنرمندی کے فروغ اور روزگار کے مواقع بڑھانے کے لیے مفاہمتی یادداشت (ایم او یو) پر دستخط کر دیے ہیں۔ یہ اشتراک وزیراعلیٰ پنجاب مریم نواز شریف کے "ہنرمند نوجوان" پروگرام کے تحت متوقع پنجاب انڈسٹریل کلسٹرز پروگرام (PICP) کا حصہ ہے۔

معاہدے کے تحت دونوں ادارے سرکاری اور نجی شعبے کے درمیان روابط کو مضبوط بنائیں گے تاکہ تربیتی اداروں اور صنعتوں کے درمیان موجود خلا کو کم کیا جا سکے، ہنرمند افرادی قوت تیار کی جائے اور تربیت کو لیبر مارکیٹ کی ضروریات سے ہم آہنگ بنایا جا سکے۔

اس شراکت داری کے تحت خواتین کو بھی غیر روایتی، تکنیکی، صنعتی، ڈیجیٹل اور برآمدی شعبوں میں ہنرمندی کی تربیت اور روزگار کے بہتر مواقع فراہم کرنے پر خصوصی توجہ دی جائے گی۔

پی ایس ڈی ایف اور ایف پی سی سی آئی مشترکہ طور پر ایسے طریقہ کار وضع کریں گے جن کے ذریعے ابھرتے ہوئے صنعتی شعبوں، مستقبل کی افرادی قوت کی ضروریات اور نئی مہارتوں کی نشاندہی کی جا سکے گی۔ اس کے علاوہ انٹرن شپ، اپرنٹس شپ، ورک بیسڈ لرننگ، کیریئر آگاہی پروگرامز اور آجر اداروں کے ساتھ روابط کو فروغ دیا جائے گا تاکہ تربیت یافتہ نوجوانوں کی ملازمتوں تک رسائی آسان بنائی جا سکے۔

معاہدے کے تحت مشترکہ سیمینارز، تکنیکی ورکشاپس، پالیسی ڈائیلاگ، تحقیقی سرگرمیوں اور معلومات کے تبادلے کے پروگرام بھی منعقد کیے جائیں گے تاکہ افرادی قوت کی منصوبہ بندی، صنعتی مسابقت اور برآمدات پر مبنی انسانی وسائل کی ترقی کو فروغ دیا جا سکے۔

اس موقع پر پی ایس ڈی ایف کے چیف ایگزیکٹو آفیسر احمد خان نے کہا کہ ہنرمندی کے فروغ کا مستقبل صنعتوں کے ساتھ مضبوط شراکت داری میں مضمر ہے۔ ان کا کہنا تھا کہ نجی شعبے کو تربیتی پروگراموں کی منصوبہ بندی اور بہتری کے عمل میں شامل کرکے نوجوانوں کو مارکیٹ کی ضروریات کے مطابق مہارتیں فراہم کی جائیں گی، جس سے روزگار اور معاشی ترقی کو فروغ ملے گا۔

ایف پی سی سی آئی کے ریجنل چیئرمین اور نائب صدر زکی اعجاز نے کہا کہ پاکستان کی معاشی ترقی کا انحصار ایسی افرادی قوت پر ہے جو صنعتوں کی ضروریات کے مطابق تکنیکی مہارتوں سے آراستہ ہو۔ انہوں نے وزیراعلیٰ پنجاب مریم نواز شریف کو صنعتی شعبے کے لیے ہنرمندی کی تربیت کو ترجیح دینے پر سراہتے ہوئے کہا کہ ایف پی سی سی آئی، جو معیشت کے 170 سے زائد شعبوں کی نمائندگی کرتی ہے، اس شراکت داری کے ذریعے افرادی قوت کی تربیت کو صنعتی ضروریات سے ہم آہنگ بنانے میں اہم کردار ادا کرے گی۔

انہوں نے کہا کہ یہ اقدام ویژن 2030 کے تحت پاکستان کی برآمدات کو 100 ارب ڈالر تک لے جانے کے ہدف میں بھی معاون ثابت ہوگا۔

دونوں اداروں کا کہنا ہے کہ اس اشتراک کا مقصد ہنرمندی کو صنعتی ترقی، برآمدی مسابقت اور پائیدار روزگار کے فروغ کا بنیادی ذریعہ بنانا ہے تاکہ عوامی اور نجی شعبے کے تعاون سے ایسی افرادی قوت تیار کی جا سکے جو تیزی سے بدلتی ہوئی معیشت کی ضروریات پوری کرنے کے ساتھ پنجاب کی طویل المدتی معاشی ترقی میں بھی مؤثر کردار ادا کرے۔