چیئرمین یوتھ پروگرام رانا مشہود احمد کی پنجاب یونیورسٹی کے فلم اینڈ براڈکاسٹنگ ڈیپارٹمنٹ کو مکمل تعاون کی یقین دہانی

لاہور: وزیرِاعظم یوتھ پروگرام کے چیئرمین رانا مشہود احمد خان نے  پنجاب یونیورسٹی کے فلم اینڈ براڈکاسٹنگ ڈیپارٹمنٹ کی چئیرپرسن ڈاکٹر لبنی ظہیر سے ملاقات کی۔  ملاقات میں شعبے کے مختلف تعلیمی، تخلیقی اور صنعت سے متعلق منصوبوں پر تبادلۂ خیال کیا گیا۔

ملاقات کے دوران ڈاکٹر لبنیٰ ظہیر نے چیئرمین رانا مشہود احمد خان کو فلم ڈیپارٹمنٹ میں جاری مختلف منصوبوں اور اقدامات کے بارے میں بریفنگ دی۔ اس موقع پر فلم اینڈ براڈکاسٹنگ ڈیپارٹمنٹ کے فیچر فلم پراجیکٹ پر بھی تفصیلی گفتگو ہوئی، جس کا مقصد طلبہ کو عملی تربیت فراہم کرنا اور پاکستان کی فلمی صنعت کے فروغ میں کردار ادا کرنا ہے۔

رانا مشہود احمد خان نے میڈیا اور فلم انڈسٹری کے لیے تربیت یافتہ اور باصلاحیت افرادی قوت تیار کرنے میں شعبہ فلم کی خدمات کو سراہا۔ انہوں نے کہا کہ فلم اینڈ براڈکاسٹنگ ڈیپارٹمنٹ نوجوانوں کی پیشہ ورانہ صلاحیتوں کو نکھارنے اور اکیڈیمیا اور انڈسٹری کے درمیان رابطے کو مضبوط بنانے میں اہم کردار ادا کر رہا ہے۔

انہوں نے وزیرِاعظم یوتھ پروگرام اور وفاقی حکومت کی جانب سے فلم ڈیپارٹمنٹ کے منصوبوں اور مستقبل کی سرگرمیوں کے لیے ہر ممکن تعاون کی یقین دہانی بھی کرائی۔

اس موقع پر رانا مشہود احمد خان نے ڈاکٹر لبنیٰ ظہیر کو حکومتِ پاکستان کی جانب سے صدارتی ایوارڈ برائے حسن کارکردگی سے نوازے جانے پر مبارکباد پیش کی اور ان کے لیے نیک تمناؤں کا اظہار کیا۔