بھارتی چیف جسٹس کے نوجوانوں سے متعلق متنازع بیان کے بعد شروع ہونے والی مہم ’کاکروچ جنتا پارٹی‘ کیا ہے؟

بھارتی سپریم کورٹ کے چیف جسٹس کے  نوجوانوں سے متعلق متنازع ریمارکس کے بعد شروع کی گئی تحریک ان دنوں سوشل میڈیا پر چھائی ہوئی ہے اور  ایک نوجوان نے ’کاکروچ جنتا پارٹی‘ کے نام سے نئی تحریک شروع کرنے کا اعلان کیا ہے۔ 

چند روز قبل بھارتی سپریم کورٹ میں جاری ایک سماعت کے دوران چیف جسٹس سوریا کانت نے ریمارکس دیتے ہوئے کہا کہ کچھ بے روزگار نوجوان ’کاکروچ‘ کی طرح نظام پر حملہ آور ہوتے ہیں اور سوشل میڈیا پر حکومت کے خلاف سرگرم کارکن بن جاتے ہیں، بعد میں انہوں نے وضاحت دی کہ میرا یہ بیان تمام نوجوانوں کے لیے نہیں تھا۔

بھارتی چیف جسٹس کے اس بیان کے بعد سوشل میڈیا پر شدید ردِعمل سامنے آیا جہاں بے روزگاری، مہنگائی اور سیاسی تقسیم سے پریشان بھارتی نوجوانوں نے اسے اپنی توہین قرار دیا اور ایسے میں 30 سالہ نوجوان ابھیجیت دیپکے نے طنزیہ انداز میں ’کاکروچ جنتا پارٹی‘ کے نام سے سوشل میڈیا پر مہم شروع کی جسے سوشل میڈیا پر بے پناہ مقبولیت مل رہی ہے۔ 

ابھیجیت دیپکے کی شروع کی گئی اس مہم کو سوشل میڈیا پر بڑی پزیرائی ملی اور صرف چند دنوں میں ہی  پارٹی کے انسٹاگرام فالوورز 11 ملین سے تجاوز کر گئے اور اس طرح ’کاکروچ جنتا پارٹی‘ نے بھارتی جنتا پارٹی کو بھی پیچھے چھوڑ دیا جس کے انسٹاگرام پر 8.8 ملین فالوورز ہیں۔  

دوسری جانب بھارتی میڈیا کا بتانا ہے کہ ’کاکروچ جنتا پارٹی‘ کے ایکس اکاؤنٹ کو  بھارت میں عارضی طور پر روک (Withheld)  کردیا گیا ہے۔ 

سوشل میڈیا پر مہم شروع کرنے والے نوجوان ابھیجیت دیپکے نے بی بی سی (مراٹھی) سے گفتگو میں تحریک شروع کرنے کی وجہ بتاتے ہوئے کہا کہ  چیف جسٹس کو مُلک کے آئین کا محافظ سمجھا جاتا ہے،  ایسا شخص جو اظہارِ رائے کی آزادی کی حفاظت کرنے والا ہو، وہ کیسے نوجوانوں کا موازنہ کاکروچ اور کیڑے مکوڑوں سے کر سکتا ہے۔