روس نے بین البراعظمی بیلسٹک میزائل ’سرمات‘ کا کامیابی سے تجربہ کر لیا

ماسکو:روس نے اپنے نئے ’سرمت‘ بین البراعظمی بیلسٹک میزائل (ICBM) کا کامیاب تجربہ کر لیا۔

غیر ملکی میڈیا رپورٹس کے مطابق روسی اسٹریٹیجک میزائل فورسز کے کمانڈر سرگئی کاراکائیف نے منگل کے روز صدر ولادیمیر پیوٹن کو کامیاب تجربے سے متعلق بریفنگ دی۔

روسی ٹیلی ویژن پر نشر ہونے والے بیان میں پیوٹن نے کہا کہ اس میزائل کے وارہیڈ کی صلاحیت مغربی ممالک کے کسی بھی مساوی نظام سے چار گنا زیادہ ہے، جبکہ اس کی رینج 35 ہزار کلومیٹر سے زائد ہے،صدر پیوٹن نے کہا کہ روس رواں سال کے اختتام تک سرمت میزائل کو باقاعدہ طور پر فوجی سروس میں شامل کر لے گا۔

رپورٹس کے طابق صدر پیوٹن نے سرمت کو ’دنیا کا سب سے طاقتور‘ جوہری میزائل قرار دیتے ہوئے کہا کہ یہ ہزاروں میل دور امریکا اور یورپ میں اہداف کو نشانہ بنانے کی صلاحیت رکھتا ہے۔

انہوں نے دعویٰ کیا کہ سرمت میزائل ’موجودہ اور مستقبل کے تمام  میزائل دفاعی نظاموں بچ نکلنے کی صلاحیت رکھتا ہے‘۔سرگئی کاراکائیف نے کہا کہ سرمت میزائل سسٹم سے لیس لانچرز کی تعیناتی روسی فوج کی جنگی صلاحیت میں نمایاں اضافہ کرے گی اور اسٹریٹیجک دفاعی اہداف کے حصول میں مدد دے گی۔

روسی صدر نے اس موقع پر وزارت دفاع، سائنسدانوں، انجینئرز، دفاعی صنعت سے وابستہ ماہرین، مرکزی کنٹریکٹرز اور ہزاروں کارکنوں کو اس کامیابی پر مبارکباد دی۔